Jalə Əliyeva: BMT Təhlükəsizlik Şurasının qərarı Azərbaycanın üstün mövqeyinin daha bir təntənəsidir
Bakı, 22 avqust, AZƏRTAC
XX əsrin sonlarından etibarən Azərbaycana qarşı işğalçılıq siyasəti yürüdən Ermənistan ölkəmizin parlaq Qarabağ Zəfərindən sonra da bölgədəki gərginliyin və revanşizmin mənbəyi olmaqda qalmaqdadır. Azərbaycanın Qarabağda sülhün bərqərar edilməsi istiqamətində atdığı konstruktiv addımlara baxmayaraq, Ermənistan müxtəlif əsassız iddialarla beynəlxalq müstəvidə manipulyasiya kampaniyasını davam etdirməyə cəhdlər göstərir.
Bu sözləri AZƏRTAC-a açıqlamasında Milli Məclisin Ailə, qadın və uşaq məsələləri komitəsinin sədr müavini Jalə Əliyeva söyləyib.
Deputat qeyd edib ki, 2020-ci il 10 noyabr tarixli üçtərəfli Bəyanata əsasən, Azərbaycan suveren ərazisi daxilində yerləşən və “Laçın dəhlizi” adlandırılan, heç bir eksterritorial statusu olmayan avtomobil yolunda bu günə qədər heç bir vəchlə hərəkətə mane olmayıb. Lakin Ermənistanın bu marşrutdan humanitar yardım adı altında mütəmadi olaraq qeyri-qanuni məqsədlər üçün istifadə etməsi bölgədə müvafiq nəzarətin təmin olunmasını zəruri etdi və bu səbəbdən Laçın yolunun başlanğıcında, Ermənistan-Azərbaycan sərhədində buraxılış məntəqəsi yaradıldı.
Ermənistan dövlət sərhədindən buraxılış məntəqəsinin guya yolda nəqliyyatın hərəkətinə mane olduğunu və bununla da humanitar vəziyyətin pisləşməsinə gətirib çıxardığını iddia edərək Beynəlxalq Ədalət Məhkəməsinə də müraciət ünvanladı, lakin Məhkəmənin 6 iyul tarixli qərarı ilə bu tələb rədd edildi.
Buna baxmayaraq, Ermənistan əsassız iddialarından və yersiz eyhamlarından əl çəkməyib, Laçın-Xankəndi yolunun guya “bağlanması”ndan sonra “humanitar böhran” yarandığı iddiası ilə BMT-yə müraciət edib. Avqustun 16-da BMT Təhlükəsizlik Şurası məsələnin müzakirəsi üçün təcili iclas keçirib.
Prezident İlham Əliyevin düşünülmüş xarici siyasəti, Azərbaycanın qonşu dövlətlərlə balanslı münasibətlər qurması, Qoşulmama Hərəkatına üzv dövlətlərlə ikitərəfli və çoxtərəfli əlaqələri inkişaf etdirməsi, dövlətimizin başçısının rəhbərliyi ilə beynəlxalq təşkilatlarda doğru istiqamətlərdə fəaliyyət konsepsiyasının hazırlanması və tətbiqi, tərəfdaş ölkələrlə qarşılıqlı maraqların eyni müstəviyə gətirilməsi, strateji düşüncənin ön planda tutulması kimi amillər Təhlükəsizlik Şurasında Ermənistanın son ümidlərinin puça çıxmasına səbəb olub. Belə ki, qondarma Dağlıq Qarabağ rejiminin və Ermənistanın gözləntilərinin əksinə olaraq, BMT Təhlükəsizlik Şurasında təşkil olunan müzakirədə xalqların öz müqəddəratını təyinetmə prinsipindən, qondarma Dağlıq Qarabağ rejiminin tanınmasından, Qarabağda yaşayan ermənilərə qarşı guya aclıqla təhdid edilən “soyqırımı”nın törədilməsindən, ölümlə nəticələnən aclıq hallarının baş verməsindən bəhs olunmayıb. Hətta məruzəçi dövlətlər tərəfindən Laçın dəhlizinə paralel olaraq Ağdam-Xankəndi yolunun da istifadə edilməsinin mümkünlüyü bildirilib və Azərbaycanın terror cəhdinin qarşısını almaq məqsədilə həyata keçirdiyi əməliyyatların legitimliyi təsdiqlənib. Bu isə Ermənistanın bu məsələni bir daha hər hansı beynəlxalq təşkilatda gündəmə gətirməsi ehtimalını sıfıra endirir. BMT Təhlükəsizlik Şurasının bu qərarı bir daha Azərbaycanın üstün mövqeyinin təntənəsi, siyasi və diplomatik uğurunun növbəti təzahürüdür.
Bölmənin digər xəbərləri
