Kainatın müəmmalı sirri: asteroidlər Yerə suyun necə gəlməsi ilə bağlı ipucu verir
Bakı, 15 avqust, AZƏRTAC
Yaponiyanın Hayabusa kosmik gəmisi tərəfindən götürülən asteroid nümunəsində kiçik duz hissəciklərinin tapılması kosmosda maye suyun olmasından xəbər verə bilər.
AZƏRTAC “ScitechDaily” saytına istinadla xəbər verir ki, əla növ süfrə duzu kimi tanınan natrium xlorid elm adamları üçün indiyədək ciddi tədqiqat nümunəsi olmayıb. Bununla belə, asteroid parçasında tapılan kiçik duz kristalları Arizona Universitetinin Ay və planet laboratoriyasının tədqiqatçılarının marağına səbəb olub. Çünki belə kristallar ancaq maye suyun mövcud olduğu mühitdə əmələ gələ bilər.
Tədqiqat qrupunun fikrincə, bu tapıntının ən çox maraq doğuran tərəfi odur ki, nümunə götürülən parça nəmli və su daşıyan minerallardan tamamilə məhrum S tipli asteroiddən gəlir. Bu kəşf onu deməyə əsas verir ki, Günəş sistemindən keçən asteroidlərin böyük bir hissəsi əvvəllər düşünülənin əksinə maye halda su tərkibli ola bilər.
Bu tapıntı alimlərin uzun illərdir sübut etməyə çalışdığı Yer kürəsinə suyun asteroidlərdən gəlməsi fərziyyəsini də tamamilə dəstəkləyir.
Bölmənin digər xəbərləri
