Kiberdiplomatiya üzrə Tvininq Mərkəzində ilk təlim keçirilib
Bakı, 18 mart, AZƏRTAC
Kiberdiplomatiya üzrə Tvininq Mərkəzində rəhbər şəxslər üçün kiberdiplomatiya təlimi keçirilib. Tədbir Xüsusi Rabitə və İnformasiya Təhlükəsizliyi Dövlət Xidmətinin (XRİTDX) təşkilatçılığı ilə baş tutub.
Xidmətdən AZƏRTAC-a bildirilib ki, tədbirin açılış mərasimində XRİTDX-nin rəis müavini general-mayor Allahverən İsmayılov, İnkişaf və Diplomatiya İnstitutunun direktoru, millət vəkili Fariz İsmayılzadə, “ICI Buxarest” Universitetinin rəhbəri Dr. Adrian Victor Vevera iştirak ediblər.
A.İsmayılov qeyd edib ki, texnologiyanın sürətli inkişafı, internetin və kibertəhlükəsizlik sahələrinin gündəlik həyatımızda önəminin artdığı bir zamanda diplomatiya sahəsində də yeni bir mərhələ yaranıb. Qeyd olunub ki, Tvininq Mərkəzinin ilk təlimi ölkənin sahə üzrə siyasətinin müəyyənləşdirilməsi üçün Avropa İttifaqı, ABŞ, Çin və s. kimi ölkələrin kiberdiplomatiya sahəsində konseptual yanaşmaları ilə tanışlığa şərait yaradacaq.
Təlim Azərbaycanın rəsmi şəxsləri və dövlət qurumlarının kiberdiplomatiya, kibertəhlükəsizlik və rəqəmsal sahədə beynəlxalq əməkdaşlıq bacarıqlarını gücləndirmək məqsədilə həyata keçirilib.
Rəhbər şəxslər üçün təşkil olunan bu təlim iştirakçılara kiberdiplomatiya sahəsində daha geniş bir perspektiv və təcrübə qazandıracaq, onları Azərbaycanın bu sahədəki müvafiq qərarlarını və fəaliyyətini beynəlxalq səviyyədə uğurla tətbiq etməyə imkan yaradacaq.
Qeyd edək ki, Kiberdiplomatiya üzrə Tvininq Mərkəzi ötən il Azərbaycanda keçirilmiş Kiberdiplomatiya üzrə Beynəlxalq Konfrans çərçivəsində XRİTDX, İnkişaf və Diplomatiya İnstitutu və Rumıniyanın İnformatika üzrə Milli Tədqiqat və İnkişaf İnstitutu (“ICI Buxarest”) arasında imzalanmış Anlaşma Memorandumu əsasında yaradılıb.
Bölmənin digər xəbərləri
