Kimyaçı alimlər 20 Yanvar şəhidlərinin xatirəsini anıblar
Bakı, 19 yanvar, AZƏRTAC
Elm və Təhsil Nazirliyinin Aşqarlar Kimyası İnstitutunda 20 Yanvar faciəsinin 33-cü ildönümünə həsr olunan anım tədbiri keçirilib. Əvvəlcə tədbir iştirakçıları 20 Yanvar və Qarabağ müharibəsi şəhidlərinin xatirəsinin bir dəqiqəlik sükutla yad ediblər.
İnstitutdan AZƏRTAC-a bildirilib ki, tədbiri giriş nitqi ilə açan baş direktor akademik Vaqif Fərzəliyev SSRİ tarixində sovetlər birliyinə daxil olan 15 respublikanın bir çoxunda qanlı, faciəli hadisələr törədilsə də, onlardan ən böyüyünün Azərbaycanda 1990-cı ilin Qanlı Yanvarında günahsız, əliyalın insanlara qarşı həyata keçirilən qətliam olduğunu qeyd edib. Bildirib ki, bu hadisə insanlığa qarşı törədilmiş ən ağır cinayət olmaqla yanaşı, həm də xalqımızın şərəfli, qəhrəmanlıq tarixinə daxil olan əlamətdar bir gündür: “Milli azadlığı uğrunda mübarizəyə qalxmış dinc əhaliyə divan tutulması, yüzlərlə günahsız insanın qətlə yetirilməsi, minlərlə insanın yaralanması, itkin düşməsi totalitar sovet rejiminin süqutu ərəfəsində onun cinayətkar mahiyyətini bütün dünyaya bir daha nümayiş etdirib. Qanlı hadisələrdə bütün təbəqələrdən olan günahsız insanlar - şagird, tələbə, müəllim, alim və digər görkəmli ziyalılarımız şəhid olub. Həmin qırğından 3-4 gün keçməsinə baxmayaraq, yanvarın 24-də Azərbaycanın fədakar kimyaçı alimləri - İbrahim İbrahimov, İsmayıl Mursaqulov və Svetlana Məmmədova şəhid oldular. Digər alimlər İdris Əhmədov və Parlaq Məmmədova isə ağır yaralandılar. Bəlkə də, tarixi təsadüfdür ki, bizim institutun aparıcı elmi işçisi olmuş professor İdris Əhmədov 3 il bundan öncə məhz 2019-cu il yanvarın 20-də vəfat etdi. Şübhəsiz, onun ölümündə o zaman aldığı fiziki zədə və ən əsası da mənəvi sarsıntıların öz təsiri olub”.
İnstitutun Həmkarlar Təşkilatının sədri dosent Elxan İsakov “20 yanvar Azərbaycan xalqının faciəli və qəhrəmanlıq tarixi” mövzusunda çıxış edərək bildirib ki, 20 Yanvarın təkcə faciə deyil, həm də Azərbaycanın istiqlal yolunun ilk zirvəsi, milli məfkurəmizin azadlıq istəyinin oyanış günü olduğunu deyib: “2020-ci ildə Ali Baş Komandan, Prezident İlham Əliyevin rəhbərliyi ilə 44 gün ərzində 30 ilə yaxın erməni işğalı altında qalan Qarabağ və ətraf rayonlar azad edildi. Bizə Qələbə qazandıran müzəffər Ordumuz əsası 1990-cı ilin 20 Yanvarında qoyulmuş oyanışı məntiqi sonluqla başa vurdu və ilk dəfə şəhidlərimizin qisası alındı”.
Müəssisənin Gənc Alim və Mütəxəssislər Şurasının sədri Günay İsmayılova çıxışında vurğulayıb ki, bu gün Şəhidlər xiyabanı Azərbaycanın hər bir vətəndaşının müqəddəs and yeri və ziyarətgahına çevrilib. Nəsillər dəyişsə də, Vətən oğullarının xatirəsi bundan sonrada ürəyimizdə əbədi yaşayacaq.
Tədbirdə çıxış edən aparıcı elmi işçi Nüsrət Əliyev, Mülkü Müdafiə Qərargahının rəhbəri Hüseyn Dünyamalıyev 20 Yanvar faciəsi ilə bağlı xatirələrini danışdılar.
Sonda 20 Yanvar gecəsinin dəhşətlərini əks etdirən fotolar və videotəqdimatlar nümayiş etdirilib.
Bölmənin digər xəbərləri
