Kolumbiya sahillərində 1708-ci ildə batmış gəmidəki xəzinənin təfərrüatı açıqlanıb
Bakı, 12 iyun, AZƏRTAC
Kolumbiya sahillərində xəzinə daşıyan əfsanəvi ispan gəmisinin qalıqları tapılıb. 1708-ci ildə batmış bu gəminin ətrafında tapılan qızıl sikkələr haqqında yeni təfərrüat açıqlanıb.
“Müqəddəs Qreyl” adlandırılan San-Xose gəmisi 1708-ci ildə Britaniya Hərbi Dəniz Qüvvələri tərəfindən Kartaxena yaxınlığında batırılıb və gəmidəki təxminən 600 ekipaj üzvünün əksəriyyəti həlak olub. Onun göyərtəsində milyardlarla dollar dəyərində qızıl, gümüş, qiymətli daşların olduğuna inanılırdı.
AZƏRTAC xarici mediaya istinadla xəbər verir ki, tədqiqatçılar gəminin qalıqları ətrafında tapılan mürəkkəb dizaynlı qızıl sikkələri təhlil edərək belə bir qənaətə gəliblər ki, onlar həqiqətən də əfsanəvi San-Xoseyə aiddir. “Antiquity” jurnalında dərc edilən yeni araşdırmaya görə, sikkələrin ön tərəfində qalalar, aslanlar və xaçlar, arxa tərəfində isə okean dalğalarının üstündəki “Taclı Herakl sütunları” təsvir edilib.
Kolumbiya Hərbi Dəniz Qüvvələrinin mütəxəssisləri və tədqiqatçılar uzaqdan idarə olunan nəqliyyat vasitələri (ROV) tərəfindən çəkilmiş şəkilləri tədqiq ediblər. Onlar gəminin batdığı yerin ətrafına təxminən 2000 fut (təxminən 610 metr) dərinlikdə səpələnmiş onlarla sikkə tapıblar. Tədqiqatın müəllifləri dəniz dibindəki sikkələrin dəqiq sayını müəyyən etməyin çətin olduğunu bildiriblər. Lakin ROV-lərdən yüksəkkeyfiyyətli şəkillərin təhlili göstərib ki, hər bir sikkənin diametri orta hesabla 32,5 millimetr, çəkisi isə təxminən 27 qramdır.
Bəzi sikkələrdə tədqiqatçılar PVA hərflərini ayırd edə biliblər; onlar latın devizi “Plus Ultra” və ya “Daha çox” mənasını verir. Tədqiqat müəlliflərinin fikrincə, bu söz sikkələrin üzərində ispan monarxiyasının Atlantik okeanında genişlənməsini ifadə etmək üçün işlədilib. Sikkələrin nominalını və zərb olunma tarixini (1707) göstərən rəqəmləri də görmək mümkün olub. Alimlər qeyd edirlər ki, bu dövrə aid sikkələr çox vaxt qızıl və ya gümüş külçələrdən kəsilirdi.
Keçən ilin avqustunda Kolumbiya səlahiyyətliləri uzaqdan idarə olunan aparat vasitəsilə batmış gəmini tədqiq ediblər və lövbər, küplər, şüşə butulkalar da daxil olmaqla müxtəlif artefaktlar aşkara çıxarılıb.
Həmin vaxt Kolumbiya hökuməti bir çox uzaqdan idarə olunan aparatdan istifadə edərək ölkənin Karib dənizi sahillərində batan gəmidən bu xəzinəni çıxarmağa başlayacağını açıqlamışdı. Gəmi 2015-ci ildə kəşf edilib, lakin onu potensial xəzinə ovçularından qorumaq üçün dəqiq yeri gizli saxlanılıb. Onun göyərtəsində Cənubi Amerikadan İspaniyaya göndərilən tonlarla qızıl və zümrüd dolu sandıqların olduğu bildirilir.
Bölmənin digər xəbərləri
