AZƏRTAC-ın xəbər verdiyi kimi, Cənubi Koreya oxatanı Pak Sen Xen Olimpiadanın ilkin yarışlarında 682 xal toplayaraq, italiyalı Natalya Valeyevaya məxsus dünya rekordunu (679) təzələmişdir. Ölkənin yığma komandası da 2030 xal toplayaraq, dünya rekordu göstərmişdir.

Budur, Koreya Respublikasının daha bir nümayəndəsi – İm Don Yun da onlardan geri qalmayaraq, Oyunlar başlanmamış 687 xalla dünya rekordu müəyyən etmişdir.

UKRAYNALI BOKSÇU İSƏ KOMANDASINI RÜSVAY EDİR

Bütün dünya, idman ictimaiyyəti Afina Olimpiadasının başlanmasını səbirsizliklə gözlədiyi bir vaxtda Ukrayna komandasında qanqaralığı hökm sürür. Avqustun 13-də baş verən hadisə Ukraynada da azarkeşləri çox məyus etmişdir.

Onların böyük ümid bəslədikləri 20 yaşlı boksçu İqor Paşşuk (64 kq çəki dərəcəsi) Oyunlarda iştirak etməyə buraxılmadı. Çünki ondan götürülən qan nümunəsinin dopinq testi müsbət nəticə vermiş və o, Olimpiadada çıxış etmək hüququndan məhrum olmuşdur.

Beləliklə, İ.Paşşuk amerikalı yüngül atlet qızdan sonra Afina Olimpiadasından uzaqlaşdırılan ikinci idmançıdır.