Kür və Araz transsərhəd çaylarında keçirilən monitorinqin nəticələri açıqlanmışdır
Bakı, 25 mart (AZƏRTAC). Ekologiya və Təbii Sərvətlər Nazirliyinin (ETSN) Ətraf Mühit üzrə Milli Monitorinq Departamenti Kür və Araz transsərhəd çaylarının, həmçinin qollarının çirklənmə səviyyəsini öyrənmək məqsədi ilə mart ayının ikinci ongünlüyü üçün növbəti monitorinq keçirmişdir.
ETSN-nin mətbuat xidmətindən AZƏRTAC-a bildirmişlər ki, Kür çayında suyun sərfi martın birinci ongünlüyünə nisbətən artaraq saniyədə 387 kubmetrə çatmışdır. Monitorinqin nəticələri göstərir ki, Gürcüstan və Ermənistan ərazilərindən təmizlənmədən suya axıdılan məişət və sənaye tullantılarının təsiri nəticəsində Kür çayında biogen maddələrin miqdarı normadan dəfələrlə artıq olduğundan suyun əsas çirkləndiricilərindən olan fenol və mis birləşmələri yol verilən qatılıq həddini (YVQH) keçmişdir.
Şıxlı-2 və Ağstafaçay məntəqələrində fenollar 3, mis birləşmələri 2, Ağstafaçay su anbarında isə fenollar və mis birləşmələri YVQH-dən 2 dəfə çox olmuşdur.
Ermənistan ilə transsərhəd Araz çayında suyun sərfi 262 kubmetr/saniyə təşkil etmişdir. Horadiz məntəqəsində fenollar 3, mis birləşmələri 4, Birinci Şahsevən məntəqəsində fenollar 3, mis birləşmələri 2, Bəhramtəpə məntəqəsində isə fenollar 2, mis birləşmələri YVQH-dən 3 dəfə çox olmuşdur.
Suyun oksigen rejimi bütün məntəqələrdə sanitar norma daxilində dəyişmişdir.
Bölmənin digər xəbərləri
