Laçın yolundan Zəngəzur dəhlizinə: Azərbaycan qüdrətinin həqiqətləri
Bakı, 28 iyul, AZƏRTAC
Dünyaya Azərbaycan həqiqətlərini təsdiqlədən Zəfər savaşı həm də “Qarabağ Azərbaycandır!” şüarını bunun əksini iddia edən erməni liderinə qəbul etdirdi. Vətən savaşından əvvəl Cıdır düzündə kef məclisi qurub sərsəm iddialarda olan Paşinyan ən yüksək səviyyədə Azərbaycanın ərazi bütövlüyünü tanıdığını və Qarabağın da ölkəmizin ayrılmaz hissəsi olduğunu bəyan etdi. İndi erməni baş nazirin daha bir sözünü geri götürmək zamanıdır. Söhbət “Laçın” dövlət sərhədindən buraxılış məntəqəsindən və Zəngəzur dəhlizindən gedir.
Bu sözləri AZƏRTAC-a açıqlamasında Milli Məclis sədrinin müavini Fəzail İbrahimli söyləyib.
F.İbrahimli bildirib: “Əvvəla onu qeyd edək ki, Azərbaycan Respublikası Dövlət Sərhəd Xidmətinin bölmələri tərəfindən ölkəmizin suveren ərazilərində, Ermənistan ilə sərhəddə, Laçın-Xankəndi yolunun başlanğıcında sərhəd-keçid məntəqəsinin yaradılması tarixi hadisə olaraq Zəfər savaşımızdan sonra ikinci böyük uğurumuz sayıla bilər. Bununla Vətən müharibəsindəki Qələbəmizə həm də rəsmi möhür vurulmuş oldu. Çünki Laçın yolu ermənilərin istədiyi kimi istifadə etdiyi marşruta çevrilmişdi və bu yolla Ermənistandan silah-sursat, hərbi texnika, minalar və canlı qüvvə daşınır, istənilən şəxs rahat şəkildə Azərbaycan ərazisinə girib-çıxa bilirdi. Daşınan minaların Azərbaycan Ordusunun hərəkət marşrutlarında basdırılması nəticəsində onlarla hərbçimiz şəhid olub. Sərhəd-buraxılış məntəqəsinin qurulması Ermənistandan Azərbaycan ərazisindəki qeyri-qanuni erməni silahlı dəstələri üçün canlı qüvvə, silah-sursat, mina, eləcə də digər hərbi təyinatlı vasitələrin daşınmasını maksimum şəkildə məhdudlaşdırmış oldu. Bu addım Azərbaycan dövlətinin qətiyyətini və Prezident İlham Əliyevin “nəyi nə zaman etmək lazım olduğunu mən yaxşı bilirəm” sözlərini bir daha təsdiqləmiş oldu”.
Ötən müddət ərzində keçid məntəqəsində ermənilərin yoxlanılaraq normal gediş-gəlişinə şəraitin yaradıldığını, eyni zamanda, Azərbaycanın Qarabağda yaşayan ermənilərə humanitar yardım üçün Ağdam-Xankəndi yolunu təklif etdiyini vurğulayan Milli Məclis sədrinin müavini diqqətə çatdırıb: “Amma “humanitar böhran”dan dəm vuran ermənilər bu təklifi rədd ediblər. Əvəzində isə hər vəchlə çalışırlar ki, Laçın dəhlizində hansısa təxribata yol açsınlar. Ölkəmiz ilə razılaşdırmadan suveren ərazimizə “humanitar yük” adı altında avtomobil karvanı göndərən Ermənistan, sözün həqiqi mənasında, təxribat şousu yaradır. Bu prosesdə təəssüf doğuran məqamlardan biri də avropalı diplomatların bu təxribat planının iştirakçısına çevrilmələridir. Belə ki, “humanitar karvan” yola salınmazdan əvvəl Ermənistandakı bəzi diplomatik nümayəndələr Ermənistan XİN-ə dəvət olunub, “zəruri planlama” aparılıb. Ardınca isə Qərbin siyasi missionerləri “humanitar karvan”dan qabaq “Laçın” dövlət sərhədindən buraxılış məntəqəsinin yaxınlığında peyda oldu. Bu diplomatlar unudurlar ki, Azərbaycan tərəfinin addımları beynəlxalq hüququn normaları ilə müəyyənləşib: hər dövlətin sərhədi və sərhəd-keçid məntəqələri olduğu kimi, Azərbaycanın da qonşu dövlətlərlə sərhəd-keçid məntəqələri yaratması və burada öz suveren hüquqlarını qoruması təbiidir. Məqsəd həqiqətən də humanitar yüklər və keçidlər üçün istifadədirsə, heç bir problem yoxdur, Azərbaycan dövləti bunun üçün alternativ marşrut təklif edib”.
F.İbrahimli qeyd edib ki, ermənilərin havadarları Ermənistan rəhbərliyinin Azərbaycanın ərazi bütövlüyünü tanıdığı halda öz iddialarından əl çəkməlidirlər. “Rəsmi Bakı dəfələrlə bəyan edib ki, rusiyalı sülhməramlıların müvəqqəti yerləşdiyi Azərbaycan ərazilərində yaşayan ermənilər üçün yüklərin daşınması məqsədilə Ağdam-Xankəndi marşrutundan istifadə oluna bilər. Bakının təklif etdiyi marşrutu Avropa İttifaqı Şurasının Prezidenti Şarl Mişel də təqdir və qəbul edib. Belə çıxır ki, indi "narahat" olan, ermənilərin şousuna qatılan Aİ nümayəndələri Ş.Mişelin mövqeyini heçə sayırlar?! Son təxribat bölgədə sülhün bərqərar olunmasına yox, yeni hərbi əməliyyatlara təkan verilməsinə yönəlib. İndi narahat olduqlarını deyən və Azərbaycana təzyiq göstərməyə çalışan avropalı siyasətçilər faktiki olaraq erməni separatizmini, revanşizmini və aqressiv radikalizmini dəstəkləyir, Azərbaycanın ərazi bütövlüyünə hörmətsizlik nümayiş etdirir, ən başlıcası isə mövqelərimizdən zərrə qədər geri çəkilməyəcəyimizi anlamırlar. Onlar hesab edirlər ki, Azərbaycana bu təzyiqi etməklə ölkəmizin öz suveren hüquqlarından imtina etməsinə nail olacaqlar. Amma unudurlar ki, Qarabağ Azərbaycan ərazisidir. Dünyada elə ölkə yoxdur ki, kimsə onun sərhədlərini “humanitar yardım” adı ilə istənilən vaxt və istənilən şəkildə pozaraq oraya qeyri-qanuni şəkildə daxil olsun. Bu təxribat şousu da iflasa uğrayacaq. Ermənilər heç bir nəticə əldə edə bilməyəcəklər. Əksinə, İrəvan və onun himayədarları Azərbaycanın qüdrəti qarşısında bir daha əyiləcəklər. İndi təxribat şousu ilə nə qədər çabalasalar da, fitnə-fəsadlar törətsələr də, əngəl olmağa çalışdıqları Zəngəzur dəhlizi mütləq açılacaq. Bu təxribat Azərbaycanın qarşısını ala bilməyəcək və gün keçdikcə Zəngəzur dəhlizi aktuallıq çəkisini artırdıqca, rəsmi Bakı lazım olan bütün addımları atacaq. Nəyi nə vaxt etməyi dəqiq bildiyimizi düşmənə dəfələrlə sübut etmişik!”, - deyə F.İbrahimli vurğulayıb.
Bölmənin digər xəbərləri
