Yaponiya hökumətinin “Ot kökləri” humanitar proqramı əsasında ayrılmış qrant hesabına Lerik qəsəbəsində inşa edilən 200 yerlik yeni ikimərtəbəli məktəb binası istifadəyə verilmişdir. AZƏRTAC-ın bölgə müxbiri xəbər verir ki, tikintisi 404 milyon 360 mln manata başa gələn məktəbin inşasında respublikamızda fəaliyyət göstərən “Qadın dünyası” ictimai birliyinin nümayəndələri ilə yanaşı yerli inşaatçılar da çalışmışlar. Məktəb üçün həmçinin 42 milyon manatlıq avadanlıq alınmışdır.

Yeni məktəb binasının istifadəyə verilməsi ilə əlaqədar toplantı keçirildi. Toplantı başlanmazdan əvvəl zəmanəmizin böyük dövlət və siyasi xadimi, ümummilli liderimiz Heydər Əliyevin xatirəsi bir dəqiqə sükutla yad edildi.

Qarabağ döyüşlərində şəhid olmuş məktəbin məzunu Malik Bağırovun adını daşıyan Lerik qəsəbə məktəbinin direktoru Araz Qurbanov, Yaponiyanın ölkəmizdəki səfiri Toşiyuki Fucivara, Milli Məclisin deputatı Miri Qənbərov, Respublika təhsil nazirinin müavini İsgəndər İsgəndərov, “Qadın dünyası” ictimai birliyinin prezidenti Kifayət Niftəliyeva, Lerik rayon icra hakimiyyətinin başçısı Füzuli Hacıyev yeni məktəbin açılışı mərasimində çıxış edərək, bu təhsil ocağının müəllim və şagirdlərinə uğurlar arzuladılar.

Sonra qonaqlar yeni məktəbin sinif otaqları ilə tanış oldular.