Londonda karnaval zamanı 334 nəfər saxlanılıb
London, 27 avqust, AZƏRTAC
Londonda avqustun 25-26-da keçirilən “Notting Hill” karnavalında ciddi insidentlər baş verib.
AZƏRTAC xəbər verir ki, London polisinin məlumatına görə, karnaval zamanı 8 nəfər bıçaqlanıb, onlardan 3-nün vəziyyəti ağır olaraq qiymətləndirilir. Hadisələr nəticəsində ümumilikdə 334 nəfər saxlanılıb. Saxlanılan şəxslərin əksəriyyətinin üzərində hücum silahları və ya narkotik maddələr aşkar edilib.
Karnaval zamanı, həmçinin 50 polis əməkdaşı müxtəlif dərəcəli bədən xəsarətləri alıb.
Qeyd edək ki, əvvəlki iki “Notting Hill” karnavalında da oxşar insidentlər baş vermişdi. Belə ki, həmin tədbirlərdə bir nəfər həlak olmuş, 14 nəfər bıçaqlanmış və 125-dən çox polis əməkdaşı hücuma məruz qalmışdı.
“Notting Hill” karnavalı Birləşmiş Krallıqda ən uzun müddət davam edən küçə festivallarından biri olmaqla, rəngarəng geyimlərdəki ifaçıların küçələrdə rəqs və musiqi ilə yürüş etdiyi böyük tədbirdir.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
