Londonda köləlik qurbanlarının xatirəsinə həsr olunan ilk abidə layihəsinin təqdimatı olub
Bakı, 24 avqust, AZƏRTAC
Londonda Transatlantik köləliyi qurbanlarının xatirəsinə ilk xatirə abidəsi açılacaq.
AZƏRTAC xəbər verir ki, London meriyası cümə günü, avqustun 23-də keçmişlə və onun irsi ilə üzləşmək istiqamətində atılan addım kimi qiymətləndirdiyi çoxdan gözlənilən abidənin layihəsini təqdim edib.
“Reuters” xəbər verir ki, memorial Londonun şərqindəki Vest İndia sahilyanı ərazisində yerləşəcək; burada XIX əsrin əvvəllərində meriya tərəfindən “köləlik məhsulları” adlandırılan Karib regionunda yetişdirilən şəkər anbarları tikilib.
London merinin icmalar və sosial ədalət üzrə müavini Debbi Uiks-Bernard qalib layihəni elan edərək deyib: “Biz bilirik ki, Londonun sərvətinin çox hissəsi qulların əməyi ilə yaradılıb”.
Artıq 300 ildən çoxdur ki, Britaniya gəmiləri üç milyondan çox afrikalı qulları Atlantik okeanı üzərindən daşıyıb və London şəhəri bu ticarətin maliyyə mərkəzi olub.
Şəhər meri Sadiq Xan deyib: Londonun küçələrinin, heykəllərinin və abidələrinin ortaq tariximizi əks etdirməsi vacibdir və bu memorial londonlulara insanlarla bu dəhşətli rəftarda paytaxtın rolunu xatırlatmağa və öyrətməyə kömək edəcək”.
Dizayner Haleb Bruksun yaratdığı memorial qul ticarətində bütün Afrikada pul vahidi kimi geniş istifadə olunan kauri qabıqlarının bir formasıdır. Onun içərisində kölələrin adları həkk olunacaq. Memorialın inşası 2026-cı ildə başa çatacaq.
Bölmənin digər xəbərləri
