Vyana, 26 fevral, AZƏRTAC

Böyük Britaniyanın Sky News telekanalının internet saytında Lordlar Palatasının ermənipərəst üzvü Baronessa Kerolayn Koks barəsində geniş araşdırma dərc olunub.

AZƏRTAC xəbər verir ki, “Vestminster bank hesabları: Baronessa Koks anti-İslam əleyhdarları ilə əlaqələri üzə çıxdıqdan sonra maliyyə maraqlarını açıqlamağa məcbur oldu” başlıqlı məqalədə onun ABŞ-da yerləşən təşkilatlardan aldığı maliyyə vəsaitləri və İslam əleyhdarları ilə müntəzəm görüşlərindən bəhs edilir.

Məqalədə qeyd edilir ki, Lordlar Palatasının bu qalmaqallı üzvünün aparıcı anti-İslam fəalları ilə əlaqələrini ehtiva edən sənədlərin ictimaiyyətə sızmasından sonra o, maliyyə maraqlarını bəyan etmək məcburiyyətində qalıb. Baronessa Koks bildirib ki, onun parlament araşdırmaları üçün “Equal and Free Limited” qeyri-hökumət təşkilatı tərəfindən göstərilən maliyyə dəstəyini qeydiyyatdan keçirməməsi “diqqətsizlikdən” baş verib.

Böyük Britaniyada parlament qaydalarına əsasən, hər iki palatanın üzvləri kənar təşkilatlardan aldıqları maliyyə dəstəyini açıq şəkildə göstərməlidirlər, lakin onlar həmin vəsaitlərin əsl mənşəyi barədə açıqlama verməyə məcbur deyillər. Bu isə kənar maraqların parlamentarilərin fəaliyyətini dəstəkləməyə, onları öz maraqlarını təmin etmək üçün yönəltməyə, lobbiçilik aparmağa meydan açır. Bu vəsaitlərin arxasında, əslində, kimlərin dayanması və maliyyənin haradan gəlməsi qaranlıq qalır.

Anti-rassizm kampaniyaları aparan “Hope not Hate“ qrupunun əldə etdiyi və Sky News kanalına təqdim edilən iclas protokollarına əsasən, Baronessa Koks müntəzəm şəkildə tanınmış və qalmaqallı İslam tənqidçilərini parlament binasına dəvət etmiş və orada həmin şəxslərlə görüşlər keçirmişdir. Həmin protokollarda Lord Pearsonun da adı keçir. Bu həmin şəxsdir ki, 2010-cu ildə Baronessa Koks ilə birgə niderlandlı sağçı radikal Qeert Vidersi Böyük Britaniyaya dəvət etmişdi.

2015-ci ilə aid bir iclasın protokolunda isə İslam dininin “müsəlman olmayan hər kəsə qarşı düşməncəsinə niyyət” daşıdığı əksini tapır. Həmin protokolda daha sonra qeyd edilir ki, Qərb hazırda İslama qarşı ideoloji müharibədədir və gələcəkdə ”qanlı qarışıqlıq” olacağı proqnozlaşdırılır.

Mətbuata sızdırılan sənədlərdə qeyd edilir ki, “Equal and Free Limited” Baronessa Koksun müsəlman məhkəmələri (muslim arbitration tribunals) ilə bağlı yeni qanun layihəsi üçün yaradılıb. Lakin “Hope not Hate“ təşkilatının rəyinə görə, baronessanın bu təşkilatı heç də radikal və siyasi İslamdan narahat deyil: “Bu qrup sadəcə olaraq İslamı Qərb üçün bir təhlükə kimi görür. O, İslamı Qərb mədəniyyət və Qərb sivilizasiyası ilə münaqişədə hesab edir”, - deyə “Hope not Hate“ təşkilatının icraçı direktoru Nik Loules bildirib. Sənədlərdə müsəlman qadınlarının müxtəlif məhkəmə proseslərində şahid kimi ifadəsinin dəstəklənməsi üçün ABŞ-dakı mənbədən maliyyə dəstəyi alındığı da əksini tapıb. Lakin baronessa Los-Ancelesdə yerləşən şirkətdən nə qədər pul aldığını açıqlamaqdan boyun qaçırır.

Qeyd edək ki, “kürkünə birə düşən” Baronessa Koksun lobbiçiliyini etdiyi digər istiqamətlər üzrə sənədlərin üzə çıxması isə an məsələsidir. Onun hələ 2006-cı ildə Ermənistan prezidenti tərəfindən təltif edildiyi “Mxitar Qoş Medalı” necə deyərlər medalın görünən üzüdür və onun ermənipərəstliyinin kökündə hansı maliyyə sirlərinin dayandığı da ortaya çıxacaqdır.