Mark Rutte: Almaniya hərbi xərclərini artırmalıdır
Berlin, 2 fevral, AZƏRTAC
NATO-nun Baş katibi Mark Rutte Almaniyanın hərbi xərclərini artırmasının vacibliyini bildirib.
AZƏRTAC xəbər verir ki, M.Rutte bu barədə "Bild" qəzetinə açıqlamasında qeyd edib.
Almaniyanın Rusiya-Ukrayna müharibəsindən sonra NATO-ya mühüm töhfələr verdiyini vurğulayan M.Rutte deyib: “Almaniya Ukraynadakı müharibənin əvvəlindən etibarən doğru addımlar atdı. Litvaya daimi briqada göndərdi və Avropadakı heç bir NATO üzvünün etmədiyi yardımı Ukraynaya göstərir. Avropada ilk sıradadır. Ancaq Almaniya iqtisadiyyatının böyüklüyünə baxdıqda, təbii olaraq, daha çox etməsini gözləyirik. Mən Almaniyanın güclü silah şirkətləri, yenilikçi gücü ilə istehsalı artırmalı olduğuna inanıram. Almaniya hərbi xərclərini artırmalıdır, bu lazım olacaq”.
Qeyd edək ki, NATO üzvləri arasında hərbi büdcənin artırılması məsələsi müzakirə olunur. Hazırkı qaydaya əsasən, üzv ölkələr ümumi daxili məhsulun (ÜDM) 2 faizini hərbi büdcə üçün ayırmalıdır. ABŞ Prezidenti Donald Tramp hərbi xərclərin ÜDM-in 5 faizinə çatdırılmasında israr etsə də, bu hədəfə hələ Birləşmiş Ştatlar da çatmayıb.
AZƏRTAC-ın xüsusi müxbiri
Berlin
Bölmənin digər xəbərləri
