Marneulidə azərbaycanlı abituriyentlər üçün ilk sınaq imtahanı keçirilmişdir
Marneuli, 20 may (AZƏRTAC). Gürcüstanın Təhsil və Elm Nazirliyi və Marneuli Gənclər Mərkəzinin (MGM) birgə təşkilatçılığı ilə azərbaycanlıların yığcam yaşadıqları Kvemo Kartli-Borçalı bölgəsinin Marneuli şəhərində azərbaycanlı abituriyentlər üçün ilk dəfə sınaq imtahanı keçirilmişdir.
İmtahanın gedişini yerli hakimiyyət nümayəndələri, Gürcüstan parlamentinin deputatı Azər Süleymanov, reinteqrasiya məsələləri üzrə Gürcüstan Dövlət Nazirliyinin məsul əməkdaşı Savalan Mirzəyev və digər rəsmi şəxslər izləmişlər.
İmtahanda iştirak edən 200 nəfər azərbaycanlı abituriyent məntiqdən və riyaziyyatdan 80 sualı cavablandırmışdır.
İmtahanının nəticələri bir həftədən sonra açıqlanacaqdır və nəticələr MGM-nin internet səhifəsində yerləşdiriləcəkdir.
MGM idarə heyətinin üzvü Zaur Darğallı AZƏRTAC-a bildirmişdir ki, bölgədə ilk dəfə keçirilən sınaq imtahanının məqsədi azərbaycanlı abituriyentləri ali məktəblərə qəbul imtahanlarının keçirilməsi qaydaları ilə tanış etmək, onların psixoloji hazırlıqlarını yoxlamaqdır. O demişdir ki, bu il Gürcüstanın ali məktəblərinə qəbul imtahanlarında iştirak etmək üçün 1000 nəfər azərbaycanlı qeydiyyatdan keçmişdir. Bu göstərici 2012-ci ildəkindən iki dəfə çoxdur. Bu, eyni zamanda, azərbaycanlı gənclərin gürcü ictimaiyyətinə inteqrasiyaya marağının artmasının bariz göstəricisidir.
Z. Darğallı onu da qeyd etmişdir ki, azərbaycanlı gənclərin ölkə həyatının bütün sahələrində fəallığının artırılması üçün mühüm tədbirlər planı hazırlanmışdır.
İslam Əliyev,
AZƏRTAC-ın xüsusi müxbiri.
Marneuli
Bölmənin digər xəbərləri
