MDB-nin Minskdəki qərargahında hüquq mühafizə sahəsində əməkdaşlıq məsələləri müzakirə ediləcək
Minsk, 1 dekabr, AZƏRTAC
Dekabrın 2-4-də Belarus paytaxtında, MDB-nin icraiyyə komitəsində hüquq mühafizə sahəsində əməkdaşlığa dair sənədlərin layihələşdirilməsi üzrə ekspert qrupunun iclası keçiriləcək. Bu barədə AZƏRTAC-a təşkilatın Minskdəki qərargahının mətbuat xidmətindən məlumat verilib.
Ekspertlər iki sənədi - Dövlətlərarası Axtarış üzrə Səlahiyyətli Orqanların Reqlamentinin Layihəsini və Yetkinlik yaşına çatmayanların daimi yaşadıqları dövlətlərə qaytarılması məsələlərində MDB üzvü olan dövlətlərin əməkdaşlığına dair Sazişin İcra Protokolunun Layihəsini müzakirə edəcəklər.
Yetkinlik yaşına çatmayanların qaytarılması məsələlərində əməkdaşlıq haqqında saziş 2002-ci il oktyabrın 7-də qəbul edilib. Bu sənədi Azərbaycan, Belarus, Qazaxıstan, Moldova, Rusiya, Tacikistan, Özbəkistan və Ermənistan hökumətlərinin başçıları imzalayıblar. Sazişi imzalayan ölkələrdə qanunvericiliyin dəyişməsi ilə əlaqədar, həmin sənədin yenidən işlənməsi tələb olunur.
Sazişdə müəyyən edilir ki, Birlik ölkələrinin səlahiyyətli orqanları himayəsiz qalmış yetkinlik yaşına çatmayanların axtarılması və daimi yaşadıqları dövlətlərə qaytarılması məsələlərində müvafiq sorğu əsasında bir-birinə kömək etməlidirlər.
Xüsusi müəssisəyə yerləşdirilmiş yetkinlik yaşına çatmamış şəxsin cinayət məsuliyyətinə cəlb edilməsi və ya hökmün icrası üçün başqa dövlət tərəfindən axtarılması müəyyən edildikdə o, həmin dövlətə beynəlxalq müqavilələr əsasında və həmin müqavilələrdə nəzərdə tutulan qaydada verilə bilər.
Daimi yaşadıqları dövləti valideyn himayəsi və qəyyumluq hüququnu həyata keçirən şəxslərin icazəsi olmadan tərk etmiş və başqa dövlətin ərazisinə keçmiş yetkinlik yaşına çatmayanlar həmin dövlətin qanunvericiliyində nəzərdə tutulan qaydada və müvafiq şərtlər daxilində bu dövlətin ixtisaslaşdırılmış müəssisələrinə yerləşdiriləcəklər.
Bu halda tərəflər ixtisaslaşdırılmış müəssisələrə yerləşdirmiş yetkinlik yaşına çatmayanların hamısı üçün əlverişli və bərabər şərait yaratmağı öhdəyə götürürlər.
Sənəddə yetkinlik yaşına çatmayanların daimi yaşadığı dövlətə qaytarılması üçün təhvil verilməsi şərtləri, onların saxlanması və daşınması üçün xərclərin bölgüsü qaydası göstərilib, habelə yetkinlik yaşına çatmayanların daimi yaşadığı dövlətə qaytarılması, tranzit qaydası üzrə getməsi, vizaların sənədləşdirilməsi və başqa məsələlərin həlli zamanı tərəflərin səlahiyyətli orqanlarının ixtisaslaşdırılmış müəssisələrə və yetkinlik yaşına çatmayanları müşayiət edən şəxslərə kömək etməsini tənzimləyən norma təsbit olunub.
Zeynal Ağazadə
AZƏRTAC-ın xüsusi müxbiri
Minsk
Bölmənin digər xəbərləri
