Milli Təhlükəsizlik Nazirliyində ümummilli lider Heydər Əliyevin xatirəsinin anım tədbirləri keçirilib
Bakı, 11 dekabr, AZƏRTAC
Milli Təhlükəsizlik Nazirliyində (MTN) ümummilli lider Heydər Əliyevin xatirəsinin anım tədbirləri keçirilib.
MTN-nin ictimai əlaqələr mərkəzindən AZƏRTAC-a bildiriblər ki,
general-polkovnik Eldar Mahmudov və Milli Təhlükəsizlik Nazirliyinin şəxsi heyəti Fəxri xiyabana gələrək Azərbaycanın təhlükəsizlik orqanlarının əbədi və fəxri rəhbəri, bu mühüm dövlət təsisatında milliləşmə prosesinin və peşəkarlıq məktəbinin banisi, nazirliyin xalqın maraqlarının və təhlükəsizliyinin etibarlı təminatçısı kimi formalaşmasında misilsiz xidmətləri olan ümummilli lider Heydər Əliyevin xatirəsini ehtiramla yad edib, məzarı önünə əklil qoyublar.
Görkəmli oftalmoloq alim, akademik Zərifə xanım Əliyevanın da xatirəsi ehtiramla anılıb, məzarı üzərinə gül dəstəsi düzülüb.
Sonra anım mərasimi Milli Təhlükəsizlik Nazirliyinin Heydər Əliyev adına Akademiyasında davam etdirilib. Əvvəlcə Ümummilli Liderin xatirəsi bir dəqiqəlik sükutla yad olunub, dövlət himni səsləndirilib.
Akademiyanın rəisi general-leytenant Ziya Yusifzadə çıxış edərək bildirib ki, Heydər Əliyev haqqında söz demək məsuliyyətli və çətin olduğu qədər də şərəflidir. Çünki Heydər Əliyev əsrimizin zirvəsi, xalqımızın lideridir. Ulu Öndərin həyat və fəaliyyəti haqqında yüzlərlə kitab, minlərlə məqalə yazılıb, namizədlik və doktorluq dissertasiyaları müdafiə olunub. Heydər Əliyev fenomeni, mənəvi irs xəzinəsi tükənməzdir. Nə qədər müraciət etsən də, gələcək nəsillərə çatdırsan da, bitib tükənməyəcək, daim nur saçacaq.
Ulu Öndərin xarakterik xüsusiyyətlərindən və iş prinsiplərindən söz açan Z.Yusifzadə qeyd edib ki, taleyin qisməti ilə o, ömrünün yarıdan çoxunu Heydər Əliyevin rəhbərliyi altında işləyib. Ulu Öndərin dahiyanə şəxsi və insani keyfiyyətlərinin, tükənməz təşkilatçılıq qabiliyyətinin bilavasitə iş prosesində şahidi olub. Ümummilli lider Heydər Əliyev istər sıravi və istərsə də rəhbər vəzifələrdə işləyəndə daim öz nizam-intizamı, işə tələbkarlığı ilə seçilirdi. O, əsl zabit kimi tabeçiliyində olanlara nümunə göstərirdi. Başqaları ilə yanaşı, özünə qarşı da tələbkar olduğundan bu, xeyirxahlığı kimi, müsbət qarşılanır, təbii qəbul edilirdi. Səbəb isə Heydər Əliyev şəxsiyyətidir, onun təbiətdən gələn, millətinə, Vətəninə dərin məhəbbətini göstərən yüksək keyfiyyətləridir.
Natiq bildirib ki, hər bir xalq onun mentalitetini özündə əks etdirən, qəhrəmanlarının məziyyətlərini özündə daşıyan şəxsiyyətləri lider kimi görmək istəyir. Ulu öndər Heydər Əliyev də Azərbaycan xalqının önəm verdiyi bu yüksək dəyərlərin daşıyıcısı idi. Səbirli və tədbirli olduğu qədər də, cəsarətli və qətiyyətli, sözü ilə əməli bir olan bütöv insan idi. Heç vaxt geri çəkilməzdi, dünyada heç bir qüvvə onu öz yolundan döndərə bilməzdi. Vətən sevgisi, millət təəssübkeşliyi onun canında, qanında idi. Heydər Əliyev təhlükəsizlik orqanlarında işləyəndə də milli ziyalıları cəsarətlə müdafiə edir, onları hər cür təqib və təzyiqlərdən qoruyurdu. Azərbaycana birinci rəhbərliyi dövründə qapalı sistemin qadağalarına baxmayaraq, cəmiyyətdə saflığın və düzgünlüyün müdafiəsinə qalxmışdı. Heç bir şeydən çəkinmədən həqiqəti deyirdi. Çünki təbiətən haqq-ədalət tərəfdarı idi. Sovet İttifaqı rəhbərliyində təmsil olunanda, Moskvada işləyəndə də Azərbaycanı daim müdafiə edir, respublikanın problemlərini qabardır, həllinə nail olmaq istəyirdi. Buna görə də Azərbaycan xalqı onu sevir, dəstəkləyirdi. Azərbaycanın xüsusi xidmət orqanlarının inkişafında əvəzsiz rolu olan ulu öndər Heydər Əliyevin şanlı məktəbinin ənənələrini qürurla yaşadan Milli Təhlükəsizlik Nazirliyinin şəxsi heyəti də Ümummilli Liderin dövlətçiliyin və milli maraqların etibarlı qorunması irsini əzmlə davam etdirir.
Ulu öndər Heydər Əliyevin uzaqgörən, dahi şəxsiyyət olduğunu təsdiqləyən əsas amillərdən biri də daim Azərbaycanın gələcəyini düşünməsi, onun siyasətini davam etdirməyə, arzularını, ideyalarını gerçəkləşdirməyə qadir olan İlham Əliyev kimi müdrik bir siyasətçini yetişdirməsi, ona inanması və etimad göstərməsidir. Azərbaycan xalqı da Ümummilli Liderin bu etimadını yüksək dəyərləndirdi və millətin, dövlətin taleyini təyin etmək kimi məsuliyyətli vəzifəni İlham Əliyevə etibar etdi. Azərbaycan Prezidenti İlham Əliyev bu gün öz şərəfli işi, yorulmaz fəaliyyəti ilə Ümummilli Liderin və xalqın ona olan inamını, etimadını şərəflə doğruldur. Nəticələr göz önündədir. Hazırda bütün dünyada iri miqyaslı qarşıdurmaların, iqtisadi böhranların baş verdiyi bir zamanda, Azərbaycan xalqı öz taleyindən arxayındır, sabaha inamla baxır. Çünki Azərbaycanın bu günü, sabahı etibarlı əllərdədir. Prezident İlham Əliyev bu cür mürəkkəb zamanda ölkəyə bacarıqla başçılıq edir, Azərbaycanı iqtisadi böhranlardan qoruyaraq irəli, inkişafa və rifaha doğru aparır. Respublikamız dünya miqyasında iqtisadi artım sürətinə görə ön sıralarda gedən, yenilikçi və islahatçı ölkə kimi tanınır, beynəlxalq aləmdə nüfuzu getdikcə artır.
General-leytenant Ziya Yusifzadə qeyd edib ki, Heydər Əliyevin müdrik və uzaqgörən siyasəti Prezident İlham Əliyev tərəfindən uğurla və yaradıcılıqla davam etdirilir. Ulu öndər Heydər Əliyev deyirdi: “Biz həm ölkəmizin suverenliyini, ərazi bütövlüyünü qorumaq üçün çalışırıq, həm də vətəndaşlarımızın rifahını yaxşılaşdırmağa, yaranmış vəziyyətdə müxtəlif və yeni formalardan istifadə edərək iqtisadiyyatı inkişaf etdirməyə çalışırıq”. Prezident İlham Əliyevin həyata keçirdiyi daxili və xarici siyasətin də əsas hədəfləri budur: xalqımızın azad, təhlükəsiz və firavan yaşaması, Dağlıq Qarabağ probleminin Azərbaycanın ərazi bütövlüyü, beynəlxalq normalar əsasında həll olunması, qaçqın və məcburi köçkün soydaşlarımızın ata-baba yurdlarına qayıtmasıdır.
Tədbirdə çıxış edən Akademiyanın kafedra rəisi A.İsmayılov, dinləyici A.İsalı, kursantlar E.Qeybullasoy və İ.Əzizli ümummilli lider Heydər Əliyevin gənclərə göstərdiyi diqqət və qayğıdan, dahi şəxsiyyətin misilsiz fəaliyyəti nəticəsində Azərbaycanın müstəqilliyini qoruyub saxlamasından, müasir dövlət quruculuğundakı rolundan danışıblar. Ulu Öndərin ideyalarının həyata keçirilməsində fəal iştirakçı olmaqdan şərəf və qürur duyduqlarını bildiriblər.
Tədbirin sonunda ümummilli lider Heydər Əliyevin həyat və fəaliyyətindən bəhs edən sənədli filmi nümayiş etdirilib.
Bölmənin digər xəbərləri
