Millinin məşqçisi: İnanaq ki, badmintonçularımız Parisdən uğurlu nəticə ilə dönəcəklər - MÜSAHİBƏ
Debretsen, 22 iyul, AZƏRTAC
Badminton üzrə Azərbaycan millisinin və İdman Akademiyasının məşqçisi Kənan Rzayev AZƏRTAC-ın suallarını cavablandırıb. Həmin müsahibəni təqdim edirik.
- Azərbaycan İdman Akademiyasının tələbələri Macarıstanın Debretsen şəhərində keçirilən Avropa Universitet Oyunlarındakı komanda yarışlarını sonuncu - dördüncü pillədə başa vurdular. Onların çıxışını necə qiymətləndirərdiniz?
- Eyni qrupda yer aldığımız komandalar - Fransa, Litva və Macarıstan olduqca güclü idilər. Ən yaxşı oyunumuzu Macarıstanın Mişkolts Universitetinin tələbələrinə qarşı göstərdik. Onları üç kateqoriyanın hər iki setində məğlub edə bildik. Düşünürəm ki, ümumilikdə pis oyun nümayiş etdirmədik. Sadəcə, iddialı rəqiblərə qarşı görüşlərdə gücümüz kifayət etmədi. Çünki yarışlarda cəmi 4 idmançı ilə təmsil olunurduq. Digər universitetlər isə daha çox badmintonçu ilə iştirak edirdilər. Bu səbəbdən bizə qarşı rəqib komandaların şəxsi və qoşa yarışlarında fərqli idmançılar mübarizə apara bilirdi. Bizdə isə bütün kateqoriyalarda eyni idmançılar qüvvəsini sınayırdılar. Üzərilərinə çox yük düşdü. Bu da onlarda fiziki yorğunluğa səbəb oldu. Ona görə də özümüzü yaxşı tərəfdən göstərməyə gücümüz çatmadı. Bu gündən isə şəxsi yarışlara start veriləcək. Ümid edirəm ki, tələbələrimiz burada öz güclərini ortaya qoya biləcəklər.
- Bəs, Azərbaycanı iyulun 26-da Fransanın paytaxtı Parisdə start götürəcək Yay Olimpiya Oyunlarında təmsil edəcək badmintonçular - Keişa Fatimə Zəhra və Edi Reski Dviçayonun şanslarını necə dəyərləndirirsiniz?
- Olimpiadada badminton yarışları iyulun 27-dən avqustun 5-dək təşkil olunacaq. Bu, elə bir turnirdir ki, idman növündən asılı olmayaraq, öncədən proqnoz vermək olduqca çətindir. Çünki burada dünyanın ən güclüləri bir araya gəlirlər. Amma ümid edək ki, təmsilçilərimiz yaxşı nəticə göstərəcəklər. Onlar yüksək səviyyədə hazırlıq görürlər. Yaxşı nəticə əldə etmək üçün çox əziyyət çəkirlər. Orada ilk növbədə qrup mərhələsinin oyunları baş tutacaq. Növbəti görüşlər isə Olimpiya sistemi ilə həyata keçiriləcək. İnanaq ki, idmançılarımız Vətənə uğurlu nəticə ilə dönəcəklər.
- Bu, Edinin iştirak edəcəyi ikinci, Zəhranın isə ilk Olimpiadası olacaq. Sizcə, bu amil onların çıxışlarında özünü büruzə verəcəkmi?
- Düşünürəm ki, Fatimədə bir qədər həyəcan ola bilər. Çünki ilk dəfədir belə mötəbər turnirdə gücünü yoxlayacaq. Ancaq Edinin Avropa, dünya çempionatları və Olimpiadada böyük təcrübəsi var. Fikrimcə, Edi daha təmkinli, sərbəst və özünəinamlı çıxış edə, daha yaxşı nəticə göstərə bilər. Amma bu, idmandır. İdmanda nəticəni əvvəlcədən demək olmur. Hər zaman hər şey dəyişə bilər.
- 2025-ci ildə Bakı badminton üzrə Avropa çempionatına ev sahibliyi edəcək. Necə düşünürsünüz, bu turnir Azərbaycan badmintonuna nə kimi töhfə verəcək?
- Azərbaycanda ilk dəfə badminton üzrə beynəlxalq turnir 2015-ci ildə Bakıda təşkil olunmuş Avropa Oyunlarından keçirilməyə başlanıb. Bundan sonra Azərbaycan badmintonunda dirçəliş baş verib, uğurlu nəticələr əldə olunub. İdmançılarımız həm yerli, həm də beynəlxalq yarışlarda ölkəmizi layiqincə təmsil edib, bayrağımızı dalğalandırıb, himnimizi səsləndiriblər. Əlbəttə, 2025-ci ildə paytaxtımızın ev sahibliyi edəcəyi Avropa çempionatı əsasən, yeniyetmə və gənclərimizə böyük töhfələr verəcək. Onlar yüksək səviyyəli oyunları görmək və müşahidə etmək imkanı əldə edəcəklər. Həmçinin əcnəbi və yerli idmançılarla ünsiyyətdə olacaq, yenilikləri öyrənəcəklər. Bir sözlə, təcrübələrini artıracaqlar.
- Badminton yığmamızın üzvlərini qarşıda hansı beynəlxalq yarışlar gözləyir?
- Edi və Keişadan başqa, digər idmançılarımız Türkiyə və Serbiyada keçirilmiş turnirlərə qatılıb, yaxşı nəticələrlə Vətənə qayıdıblar. Qarşıda isə "Challenge" kateqoriyalı yarışlarda iştirakımız nəzərdə tutulub.
Bölmənin digər xəbərləri
