Mingəçevir V “Cyber Summer School 2026”ya ev sahibliyi edir
Mingəçevir, 6 iyul, AZƏRTAC
Azərbaycan Kibertəhlükəsizlik Təşkilatları Assosiasiyası (AKTA) tərəfindən ənənəvi olaraq təşkil edilən kiber yay düşərgəsinin budəfəki ünvanı Mingəçevir şəhəridir.
AZƏRTAC-ın bölgə müxbirinin verdiyi məlumata görə, iyulun 6-dan 11-dək davam edəcək V “Cyber Summer School 2026” (CSS-2026) Dövlət Təhlükəsizliyi Xidmətinin Milli Kibertəhlükəsizlik Mərkəzi, Gənclər və İdman Nazirliyi və Mingəçevir Dövlət Universitetinin əsas tərəfdaşlığı ilə təşkil olunub.
İlk dəfə regionda keçirilən “Cyber Summer School 2026”nın açılış mərasimi Mingəçevir şəhərindəki Heydər Əliyev Mərkəzində reallaşıb. İştirakçılar əvvəlcə Ümummilli Lider Heydər Əliyevin abidəsini ziyarət edərək, əziz xatirəsini ehtiramla anıblar.
Tədbirdə Ulu Öndər Heydər Əliyevin və şəhidlərimizin xatirəsi anılıb, Dövlət Himni səsləndirilib. Sonra "Cyber Summer School" layihəsi barədə hazırlanmış videoçarx nümayiş etdirilib.
Açılış mərasimində çıxış edən Azərbaycan Kibertəhlükəsizlik Təşkilatları Assosiasiyası İdarə Heyətinin sədri Pənah Musayev bildirib ki, artıq beşinci dəfə təşkil olunan düşərgənin əsas məqsədi kibertəhlükəsizlik sahəsində ilkin bilik və bacarıqlara malik yeniyetmə və gənclərin peşəkar inkişafına dəstək göstərmək, onların praktiki təcrübəsini artırmaq, xüsusilə regiondan olan gənclər üçün təhsil imkanlarının artırılmasına töhfə verməkdir.
Dövlət Təhlükəsizliyi Xidmətinin Milli Kibertəhlükəsizlik Mərkəzinin rəisi Davud Rüstəmov diqqətə çatdırıb ki, ölkənin kibertəhlükəsizlik sahəsində nüfuzlu inkişaf platformalarından birinə çevrilən "Cyber Summer School" hər il istedadlı gəncləri bir araya gətirərək onların peşəkar inkişafına, yeni əməkdaşlıqların qurulmasına və milli kibertəhlükəsizlik ekosisteminin gücləndirilməsinə mühüm töhfə verir. O da vurğulanıb ki, bu layihə İslam Əməkdaşlıq Təşkilatının (İƏT) Kompüter İnsidentlərinə qarşı Mübarizə Mərkəzlərinin (OIC-CERT) “Qlobal Kibertəhlükəsizlik Mükafatı 2024” beynəlxalq müsabiqəsində “Kibertəhlükəsizlikdə İnnovasiya – Tərəqqi və Rifah Naminə” nominasiyası üzrə qalib olub.
Mingəçevir Şəhər İcra Hakimiyyətinin başçısı İlham İsmayılov da kiber yay düşərgəsinin əhəmiyyətindən söz açıb. Layihənin Azərbaycanda kibertəhlükəsizlik sahəsində peşəkar insan kapitalının formalaşdırılması, gənclərin bilik və bacarıqlarının inkişaf etdirilməsi, eləcə də regionlarda kibertəhlükəsizlik ekosisteminin gücləndirilməsi baxımından əvəzsiz olduğunu diqqətə çatdırıb.
Gənclər və idman nazirinin müavini İndira Hacıyeva yeniyetmə və gənclər arasında kibersavadlılığın artırılmasının müasir dövrün tələbi olduğunu qeyd edib.
Mingəçevir Dövlət Universitetinin rektoru Anar Eminov da düşərgə çərçivəsində Azərbaycanın 60 şəhər və rayonundan seçilmiş 100-dən artıq yeniyetmənin və AKTA-nın təşəbbüsü ilə universitetlərdə yaradılmış Kiber Klub üzvlərinin bir araya gələrək, kibertəhlükəsizlik sahəsində nəzəri biliklərini artırmaqla yanaşı, praktiki bacarıqlarını da inkişaf etdirmək imkanı əldə etməsini yüksək dəyərləndirib.
Kiber yay düşərgəsi barədə AZƏRTAC-a açıqlama verən Azərbaycan Kibertəhlükəsizlik Təşkilatları Assosiasiyasının icraçı direktoru Rauf Cabarov bildirib ki, "Cyber Summer School 2026" yalnız tədris proqramı ilə məhdudlaşmır. Düşərgə müddətində iştirakçıların komanda ruhunun gücləndirilməsi, liderlik bacarıqlarının inkişaf etdirilməsi, sağlam həyat tərzinin təşviqi və gənclər arasında əməkdaşlıq mühitinin formalaşdırılması məqsədilə voleybol yarışları, beynəlxalq standartlara uyğun velotur və müxtəlif komanda əsaslı sosial fəaliyyətlər həyata keçiriləcək. "İştirakçılar üçün şəbəkə və veb təhlükəsizliyi, kibermüdafiə üsulları, rəqəmsal təhlükələrin aşkarlanması və qarşısının alınması, eləcə də kibertəhlükəsizlik üzrə digər aktual istiqamətləri əhatə edən intensiv təlimlər, laboratoriya məşğələləri, komanda tapşırıqları təşkil olunacaq. Təlim proqramının yekununda iştirakçılar əldə etdikləri nəzəri və praktiki bilik və bacarıqları “Capture The Flag” (CTF) kibertəhlükəsizlik yarışında real tapşırıqlar üzərində sınayacaqlar. CTF yarışının qaliblərinə tədbirin sponsor şirkətlərinin hədiyyələri təqdim olunacaq", - deyə Rauf Cabarov qeyd edib.
İştirakçılar CSS çərçivəsində Mingəçevir İstilik Elektrik Stansiyası və Mərkəzi Aran Regional SCADA idarəetmə mərkəzinə infotur edərək maraqlı təcrübə qazanacaq və SCADA sistemlərinə dair təlimdə iştirak edəcəklər.
Müxbir – Vüsalə Cənnətova
Bölmənin digər xəbərləri
