Misir gərginliyin azaldılması üçün Avropanın səylərinin davam etdirilməsini istəyir
Qahirə, 20 iyun, AZƏRTAC
Misir İsrail ilə İran arasında gərginliyin azaldılması və danışıqların yenidən başlanması üçün Avropanın səylərinin davam etdirilməsinin son dərəcə vacib olduğunu bir daha vurğulayır.
AZƏRTAC xəbər verir ki, bunu Misirin xarici işlər naziri Bədr Əbdülati bu gün Avropa İttifaqının xarici işlər və təhlükəsizlik siyasəti üzrə ali nümayəndəsi Kaya Kallasla baş tutan telefon danışığında deyib.
Telefon söhbəti zamanı, həmçinin Qəzza zolağında fəlakətli humanitar vəziyyətin aradan qaldırılması üçün zəruri humanitar dəstəyin göstərilməsinin vacibliyi də diqqətə çatdırılıb.
Misir XİN başçısı, həmçinin ölkəsinin Qətər və ABŞ ilə birgə Qəzzada atəşkəsin bərpası, humanitar yardımın çatdırılması istiqamətlərində göstərdiyi səylərdən danışıb. Söhbət əsnasında regionda gərginliyin azaldılması, atəşkəsin bərpası və İranın nüvə proqramı ilə bağlı davamlı razılığa nail olunması üçün danışıqlar masasına qayıdılmasının vacibliyi vurğulanıb.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
