Misli Premyer Liqasının oyunlarını iki telekanal yayımlayacaq
Bakı, 20 fevral, AZƏRTAC
AFFA, “CBC Sport” və “İdman TV” birgə bəyanat yayıb.
AZƏRTAC xəbər verir ki, bəyanatda bildirilir:
“Azərbaycan Futbol Federasiyaları Assosiasiyası ölkənin ali futbol qurumu olaraq, futbolun kütləviliyinin artırılmasını, dünyada bir nömrəli idman növünün daha geniş auditoriyaya çatdırılmasını və yayım keyfiyyətinin yüksəldilməsini hər zaman prioritet vəzifə hesab edib. Bu mənada əsas diqqət mərkəzində daim ölkə çempionatı dayanıb.
Misli Premyer Liqasının yayım coğrafiyasını genişləndirmək məqsədilə AFFA turnirin eksklüziv yayımçısı “CBC Sport” və ölkənin ilk idman telekanalı olan “İdman TV” rəhbərliyi ilə müzakirələr aparıb. Danışıqların nəticəsi olaraq qərara alınıb ki, bu mövsümdən etibarən Misli Premyer Liqasının hər turundan bir qarşılaşma “CBC Sport”la paralel olaraq “İdman TV” vasitəsilə də canlı yayımlansın.
Yeni əməkdaşlıq çərçivəsində ilk yayımın XXII turda keçiriləcək “Qarabağ”-“Sabah” matçı olması nəzərdə tutulur.
Yayımın təşkili və ümumi prosesin tənzimlənməsi ilə bağlı texniki detallar telekanallar tərəfindən qarşılıqlı razılaşma əsasında həyata keçiriləcək”.
Bölmənin digər xəbərləri
