Bakı, 8 oktyabr, AZƏRTAC

Ermənistanın təcavüzkar siyasəti bütün bölgə üçün real təhlükədir.

Bu fikir “Modern diplomacy” platformasında dərc olunan politoloq Şəbnəm Həsənovanın “Ermənistanın təcavüzkar siyasəti bütün bölgə üçün real təhlükədir” sərlövhəli məqaləsində yer alıb.

Sentyabrın 24-də Azərbaycan Prezidenti İlham Əliyevin BMT Baş Assambleyasının 75-ci sessiyasının ümumi debatlarında videoformatda çıxışı zamanı və sentyabrın 25-də Avropa İttifaqının Cənubi Qafqaz üzrə xüsusi nümayəndəsi Toivo Klaarı qəbul edərkən beynəlxalq ictimaiyyəti Ermənistan rəhbərliyinin aqressiv bəyanatları və təxribatlarının bu ölkənin Azərbaycana qarşı yeni təcavüz planlaşdırdığı barədə məlumatlandırmasına, eyni zamanda, növbəti hərbi təcavüzün qarşısını almağa çağırması ilə başlayan məqalədə Azərbaycanın səmərəli danışıqlar aparmaq niyyətinin əksinə olaraq, Ermənistanın danışıqlar prosesinin formatını və məzmununu qəsdən pozduğuna, sentyabrın 27-dən etibarən Ermənistan tərəfindən Azərbaycana qarşı törədilən növbəti təxribatın həyata keçirildiyinə diqqət çəkilir, Azərbaycan ərazilərinin və mülki əhalinin Ermənistan silahlı qüvvələrinin artilleriya atəşinə məruz qalmasından bəhs olunur.

Məqalədə, eyni zamanda, Ermənistanın bu cür hərəkətləri ilə 1949-cu il Cenevrə Konvensiyası da daxil olmaqla beynəlxalq hüququ açıq şəkildə pozduğu vurğulanır. Bu vəhşiliyin əksinə olaraq, Azərbaycan silahlı qüvvələrinin heç vaxt mülki yaşayış məskənlərinə atəşə tutmamasına diqqət çəkilir. Məqalədə Ermənistanın Azərbaycanı atəşə tutmasına baxmayaraq, Azərbaycan Silahlı Qüvvələrinin uğurlu əməliyyatları nəticəsində Füzuli-Cəbrayıl istiqamətindəki 6 kənd və Madagizin işğaldan azad edilməsi, Azərbaycan Prezidenti İlham Əliyevin Madagizin dərhal tarixi adını bərpa edərək Suqovuşan adlandırdığı, Azərbaycan Ordusunun Tərtər, Cəbrayıl və Füzuli rayonlarında daha bir neçə kəndi, Cəbrayıl şəhərini və rayonun bir neçə kəndini işğaldan azad etdiyi vurğulanır.

Oktyabrın 4-də Ermənistanın silahlı qüvvələri beynəlxalq hüququn norma və prinsiplərini, 1949-cu il Cenevrə Konvensiyasını və onun əlavə protokollarını, Birləşmiş Millətlər Təşkilatı Təhlükəsizlik Şurasının qərar və qətnamələrini yenidən açıq şəkildə pozması, Azərbaycanın mülki əhalisini qəsdən hədəfə alaraq, əhalinin sıx olduğu yerləri atəşə tutmasından bəhs olunur. Azərbaycanın ikinci böyük şəhəri olan Gəncənin atəşə tutulması nəticəsində bir nəfər ölüb, 32 nəfərin yaralandığı göstərilir.

Bununla yanaşı, məqalədə döyüşlərin yalnız səngərlərdə deyil, həm də informasiya məkanında getdiyinin, erməni xəbər maşınının müxtəlif, əsassız saxta xəbərlər istehsal edərək dünya ictimaiyyətini aldatmağa çalışmasından bəhs olunur. Türkiyənin müharibədə tərəf kimi deyil, sadəcə, sabitləşdirici rol oynadığı, Azərbaycana yalnız mənəvi dəstəyindən, Suriyadan gətirilən muzdlulardan Ermənistanın özünün istifadə etməsindən, bu kimi yalanları yaymaqla Ermənistanın öz təcavüzünə haqq qazandırmaq üçün mümkün qədər çox ölkəni münaqişəyə cəlb etməyə çalışmasından, bu gün ərazi bütövlüyünü bərpa etmək vəzifəsini ləyaqətlə yerinə yetirən Azərbaycan Ordusunun döyüş qabiliyyətini süni şəkildə azaltmağı hədəfləməsindən bəhs olunur.

Yazıda, həmçinin Pakistanın Azərbaycanın ərazi bütövlüyü məsələsində qətiyyətli mövqe nümayiş etdirməsindən, İslam Əməkdaşlıq Təşkilatının Baş Katibliyinin Ermənistan silahlı qüvvələrinin təcavüzlərini və davamlı hücumlarını kəskin şəkildə qınadığından, Bosniya və Herseqovinanın dəstəyindən, Ermənistanın təcavüzünü qəti şəkildə pisləməsindən, Azərbaycanın suverenliyinə və ərazi bütövlüyünə hörmət nümayiş etdirməsini vurğulamasından danışılır.

Eyni zamanda, ATƏT-in Minsk qrupunun həmsədrlərindən biri olan Fransanın bu məsələdə bitərəfliyini gözləməli olduğu halda, təəssüf ki, Fransa Prezidenti Makronun Ermənistana daha geniş dəstək verməsinin Azərbaycan tərəfindən tamamilə mənfi qəbul edildiyi, “Əl-Cəzirə”yə verdiyi müsahibə zamanı Prezident İlham Əliyevin Minsk qrupunun həmsədrlərinin yalnız bitərəf olduqları təqdirdə birlikdə çalışmağa davam etməli olduqlarını bildirdiyi vurğulanır.