MONEYVAL Azərbaycanın PY/TMM sahəsindəki nailiyyətlərini təsdiqləyib
Bakı, 15 dekabr, AZƏRTAC
Fransanın Strasburq şəhərində Avropa Şurasının pulların yuyulmasına və terrorçuluğun maliyyələşdirilməsinə qarşı tədbirlərin qiymətləndirilməsi üzrə ekspertlər komitəsinin (MONEYVAL) 46-cı plenar iclası keçirilib.
İclasda Azərbaycan Respublikasının Qiymətli Kağızlar üzrə Dövlət Komitəsinin sədri Rüfət Aslanlının rəhbərliyi ilə nümayəndə heyəti iştirak edib.
Komitədən AZƏRTAC-a bildiriblər ki, plenar iclasda Azərbaycanda cinayət yolu ilə əldə edilmiş pul vəsaitlərinin leqallaşdırılması və terrorçuluğun maliyyələşdirilməsinə (PY/TMM) qarşı fəaliyyət sisteminin effektivliyi üzrə növbəti qiymətləndirmə hesabatı müzakirə olunub.
Qiymətləndirmənin aparılması ilə əlaqədar MONEYVAL-ın xüsusi missiyası cari ilin fevralında Azərbaycana səfər edib, sentyabrda isə Strasburqda hesabat layihəsinin ilkin ikitərəfli müzakirəsi keçirilib.
İntensiv müzakirələr nəticəsində əvvəlki qiymətləndirmənin aparıldığı 2008-ci illə müqayisədə ölkəmizin əldə etdiyi əhəmiyyətli inkişafı və nailiyyətləri təsbit edən hesabat təsdiqlənib.
MONEYVAL katibliyi və bir sıra ölkələrin nümayəndə heyətləri hesabata dair siyasi xarakterli düzəlişlər, eləcə də Azərbaycanda PY/TMM sisteminin effektivliyinin aşağı olması barədə mülahizələr və ölkəmizə qarşı xüsusi monitorinq rejiminin bərpası ilə bağlı təkliflər irəli sürsə də, Azərbaycan nümayəndə heyətinin əsaslandırılmış arqumentləri və kəskin mövqeyi nəticəsində bu təkliflər qəbul edilməyib.
Bölmənin digər xəbərləri
