Müxalifət şüurunun deqradasiyası
Bakı, 4 avqust, AZƏRTAC
Şübhəsiz ki, müxalifət dünyanın istənilən ölkəsinin siyasi sisteminin olduqca əhəmiyyətli elementidir. Üstəlik, peşəkar müxalifət zaman keçdikcə ölkənin siyasi idarəetmə sistemini yalnız gücləndirir və işini daha səmərəli edir. Bundan başqa, demokratik müxalifət hakimiyyət üçün həm də əlavə kommunikatordur. Obrazlı desək, bu kommunikator informasiya dövriyyəsinin dinamikasını artırır. Beləliklə, sağlam müxalifət ölkənin siyasi sisteminin əlavəsi deyil, dövlət idarəçiliyinin demokratik elementidir.
AZƏRTAC xəbər verir ki, bu fikirlər politoloq Asif Adilin “Müxalifət şüurunun deqradasiyası" sərlövhəli məqaləsində yer alıb.
Müəllif ehtimal edir ki, məhz müxalifətin semantik məzmununa dair bu baxış həm Ümummilli Lider Heydər Əliyevin, həm də ölkə Prezidenti İlham Əliyevin çıxışlarında ölkədə sağlam müxalifətin əhəmiyyətini dəfələrlə vurğulamalarının əsas səbəbidir. Eyni zamanda, demək olar hər zaman prinsipial olaraq qeyd edilib ki, peşəkar və sağlam müxalifət Azərbaycanın demokratik imicinin bir hissəsidir. Siyasi partiyalar ictimai parçalanmanın deyil, cəmiyyətin hərəkətliliyinin qarantı olmalıdır.
Məqalədə Azərbaycanda hakimiyyət tərəfindən müxalifətin funksional sağlamlaşdırılması üçün mərhələlərlə bütün lazımi tədbirlərin görüldüyü faktı diqqətə çatdırılır. Vurğulanır ki, Heydər Əliyev müstəqilliyinin ilk illərində məhz ölkədə siyasi konsensusa nail ola bilməsi sayəsində Azərbaycanı parçalanmadan xilas edib. Prezident İlham Əliyevin təşəbbüsləri sayəsində isə siyasi dialoq sistemli islahatların, eləcə də regionumuzda formalaşan yeni reallığın əsas müjdəçilərindən birinə çevrilib.
"Mən deyərdim ki, müxalifətin sağlamlaşdırılması ölkəmizdə formalaşan yeni siyasi konfiqurasiyanın məzmun xüsusiyyətidir. Bu istiqamətdə dövlət təşəbbüslərinin mərhələlərinin xarakterinə diqqət yetirin. İslahatların institusional mərhələsi qismən Prezident Administrasiyasının strukturunun dəyişdirilməsi və dövlət hakimiyyəti aparatı ilə ictimai maraqların konsolidasiyası institutu olan demokratik müxalifət arasında təsirli körpü olacaq profil şöbəsinin yaradılmasından ibarətdir. İslahatların növbəti mərhələsi yeni siyasi konfiqurasiyanın gələcək görünüşünün ideoloji dizaynı mərhələsi oldu. Yeni görünüşün ideoloji təcəssümü siyasi dialoqdur. Əvvəlki üç ildə hakimiyyət siyasi dialoq atmosferinin fəal şəkildə təşəbbüskarı idi. Müxalifət partiyalarının nümayəndələri ilə daimi təmaslar, partiyaların ölkənin ictimai həyatında rolunun vurğulanması, partiyaların normal fəaliyyəti üçün lazımi şəraitin, hər cür informasiya platformalarının yaradılması, birgə müxtəlif tədbirlərin keçirilməsi, nəşrlər və digər təşəbbüslər Prezidentin bu istiqamətdə siyasətinin əsas xüsusiyyətləri idi. Bir sözlə, partiya fəallığının populyarlaşdırılması üçün bütün tədbirlər görülüb, eləcə də hakimiyyətlə müxalifət arasında açıq və etibarlı münasibətlər üçün münasib şərait yaradılıb.
Lakin hakimiyyətin bu cür demokratik təşəbbüslərinə cavab olaraq biz nə gördük? Radikallar sabitliyi pozmaq və dialoqda iştirak etməmək üçün əllərindən gələni etdilər. Səbəb açıq-aydındır: "zəhmli" müxalifət statusu üzərində monopoliyanı itirmək qorxusu. Axı bu saxta statusu itirdikləri təqdirdə, onları idarə edənlər tərəfindən verilən ən kiçik sponsorluq dəstəyindən belə dərhal məhrum olacaqlar. Yalnız bundan sonra hakimiyyət öz qanunverici funksiyasından istifadə etdi", - deyə A. Adil vurğulayır.
Məqalədə diqqətə çatdırılır ki, “Siyasi partiyalar haqqında” yeni Qanun ölkənin partiya sisteminin keyfiyyətcə yeni inkişaf mərhələsinə aparan yoldur. Qanun bütün partiyaların ilkin imkanlarını tarazlaşdırır, eyni zamanda, siyasi partiyaların ballast olmaması, yeni siyasi konfiqurasiyanın formalaşması prosesində aparıcı əlaqə olması üçün zəruri şərtlər formalaşdırır. Yeni Qanun öz məzmunu ilə radikal müxalifətin ictimaiyyətin gözündə funksional reabilitasiyası üçün bir şansdır. O, partiyalara fəaliyyətlərini sıfırdan başlamağa imkan verir.
"Lakin radikallarımızın müxalif şüurunun deqradasiyası artıq gerçəkdir. Müxalifətin məqsədinin təhrif olunmuş təsəvvürü, özünün əsassızlığı, qeyri-sağlam ambisiyaları, başqaları tərəfindən idarə olunması, intellektual boşluq, dondurulmuş siyasi şüur, konkret təkliflərin olmaması müxalifət şüurunun deqradasiyasının keyfiyyət göstəriciləridir. Bu fakt yeni siyasi konfiqurasiyanın formalaşmasının əhəmiyyətini daha da vurğulayır", - deyə politoloq fikirlərini yekunlaşdırıb.
Bölmənin digər xəbərləri
