Muxtar respublikada ekoloji maarifləndirmə tədbirləri davam etdirilir
Naxçıvan, 20 mart, AZƏRTAC
Fevral ayı ərzində muxtar respublikada ətraf mühitin mühafizəsi istiqamətində qanunsuz ov edilməsi, meşə fondu torpaqlarından qanunsuz istifadə, ətraf mühitə atılan tullantıların normadan artıq olması hallarına qarşı mübarizə aparılması məqsədilə 10 yoxlama-reyd keçirilib. Bu sahədə 3 inzibati xəta qeydə alınıb və qanunauyğun tədbirlər görülüb.
Naxçıvan Muxtar Respublikası Ekologiya və Təbii Sərvətlər Nazirliyindən AZƏRTAC-ın Naxçıvan bürosuna bildirilib ki, Sədərək Rayon Su Monitorinq Laboratoriyasında fevral ayı ərzində Araz və Arpaçayın muxtar respublikaya daxil olan hissəsindən və Sədərək rayonu ərazisindən keçən “Şir arxından” hər birindən 8 su nümunəsi olmaqla, ümumilikdə 24 su nümunəsi götürülüb və 360 analiz aparılıb. Analizlərin nəticəsində sularda çirklənmə hallarının yol verilə bilən qatılıq həddini keçməsi halı qeydə alınmayıb.
Hesabat dövründə Darıdağ Arsenli Su Müalicəxanasının ətrafındakı yamaclarda 5,5 hektar sahədə həmərsin, yemişan, badamça, alça toxumları ilə əkin işləri aparılıb, Naxçıvan-Şahbuz avtomobil yolunun sol kənarı, Uzunoba Dövlət Meşəsi ərazisində 2 hektar sahədə təmizləmə işləri görülüb, ərazidə 1623 qovaq və iydə çiliyi, 650 göyrüş, alça, qarağac tingləri və 70 qızılgül kolu ilə əkin aparılıb.
Muxtar respublikanın kənd təsərrüfatı əkinləri üçün yararsız torpaq sahələrində, həmçinin maili yamac və dağətəyi zonalarda 2020-ci ilin yaz əkin mövsümündə əkin-bərpa tədbirlərinin həyata keçirilməsi məqsədilə ərazilərə baxış keçirilib və sxem-planlar tərtib olunub.
Naxçıvan-Çalxanqala avtomobil yolunun sağ kənarında 2 hektar, Əshabi-Kəhf ziyarətgahına gedən yolun və Naxçıvan-Şahbuz avtomobil yolunun sol kənarlarının, hər birində 2 hektar, həmçinin Uzunoba Dövlət Meşəsi ərazisində 2 hektar sahədə texnika vasitəsilə torpaq hazırlığı işləri aparılıb, su arxları çəkilib.
Hesabat ayında Kəngərli rayonu ərazisində yerləşən püstə bağında, Uzunoba Su Anbarının yuxarı ətrafında salınmış yeni meyvə və üzüm bağlarında, Əshabi-Kəhf ziyarətgahına gedən yolun sol tərəfindəki meyvə bağında biotexniki tədbirlər keçirilib. Bu işlər təbiət ərazilərində davam etdiriləcək.
Qeyd olunan dövrdə kameral və ümumi xarakterli işlər çərçivəsində geoloji axtarış və kəşfiyyat işləri də davam etdirilib. Naxçıvan şəhərində inşa ediləcək “Asan xidmət” Mərkəzi və Şahbuz şəhərində inşa ediləcək yaşayış binası sahələrində buruq qazma işləri yerinə yetirilib. Toydaş sahəsi üzrə 2014-2019-cu illər ərzində yerinə yetirilmiş çöl işlərinin ilkin çöl geoloji sənədləri kameral şəraitdə hərtərəfli araşdırılıb, yekun hesabat hazırlanaraq elmi-texniki şurada müzakirə olunmaq üçün nazirliyə təqdim edilib.
Ekologiya könüllülərinin Ordubad Dövlət Təbiət Yasaqlığı ərazisinə yürüşü təşkil edilib, burada nadir və nəsli kəsilmək təhlükəsi qarşısında olan bezoar dağ keçiləri, muflonlar və digər heyvan növlərini müşahidə edib, onlara bu növlər haqqında ətraflı məlumat verilib. Bununla yanaşı, hamiliyə verilmiş ixtisasların tələbələrinin və könüllülərin iştirakı ilə hidroloji məlumatların alınması və sistemləşdirilməsinə dair seminar-məşğələ keçirilib.
Bölmənin digər xəbərləri
