Naxçıvan, 2 may, AZƏRTAC

Mayın 2-də Naxçıvan Dövlət Musiqili Dram Teatrında ümummilli lider Heydər Əliyevin anadan olmasının 92-ci ildönümünə həsr olunmuş “Naxçıvan-2015” Beynəlxalq Şahmat Festivalının açılışı olub.

Naxçıvan Muxtar Respublikası Ali Məclisinin mətbuat xidmətindən AZƏRTAC-a bildirilib ki, açılış mərasimində çıxış edən Naxçıvan Muxtar Respublikası Ali Məclisinin Sədri Vasif Talıbov Azərbaycan xalqının ümummilli lideri Heydər Əliyevin anadan olmasının ildönümü münasibətilə Naxçıvanda beynəlxalq şahmat festivalının keçirilməsinin ənənə halını aldığını bildirib, “Naxçıvan-2015” Beynəlxalq Şahmat Festivalının iştirakçılarını salamlayaraq deyib: Müdriklər gənc nəslin zehni inkişafında və formalaşmasında şahmatın imkanlarından faydalanmağın vacibliyin bildirmişlər. Bu, ondan irəli gəlir ki, şahmat bir tərəfdən gənclərin əqli inkişafına kömək edirsə, digər tərəfdən onların asudə vaxtlarının səmərəli təşkilinə xidmət edir. Azərbaycan xalqı qədimdən bu zəka oyununa böyük maraq göstərmişdir. Lakin ölkəmizdə idman növü kimi şahmatın kütləvi inkişafı ötən əsrin 70-ci illərindən başlanmışdır. Ümummilli liderimiz Heydər Əliyevin rəhbərliyi ilə həmin dövrdə rayon mərkəzlərində və şəhərlərdə şahmat məktəbləri tikilib istifadəyə verilmiş, peşəkar şahmatçılar nəsli yetişdirilmiş və Azərbaycan şahmat məktəbinin əsası qoyulmuşdur. Dahi şəxsiyyət ölkəmizin müstəqillik dövründə də şahmatın inkişafına diqqət göstərmiş, onun himayə və qayğısı ilə bu sahədə möhkəm maddi-texniki baza yaradılmışdır.

“Şahmatın inkişafı bu gün Azərbaycanda dövlət siyasətidir”, - deyən Azərbaycan Prezidenti İlham Əliyevin rəhbərliyi ilə ölkəmizdə şahmat infrastrukturunun müasirləşdirilməsi, beynəlxalq səviyyəli şahmat mütəxəssislərinin hazırlanması sahəsində ardıcıl tədbirlər görülür. Naxçıvan Muxtar Respublikasında da mükəmməl şahmat infrastrukturu yaradılıb. Bu gün Naxçıvan şəhərində Şahmat Mərkəzi, rayon mərkəzlərində isə şahmat məktəbləri fəaliyyət göstərir. Şahmat tədris müəssisələrinin hər biri üçün müasir binalar tikilib istifadəyə verilib. Hazırda muxtar respublikada 3 mindən artıq məktəbli peşəkar formada şahmatla məşğul olur. Bundan başqa, ümumtəhsil məktəblərində şahmat fənninin dərs proqramına daxil edilməsi gənclərin bu idman növünə marağını xeyli artırıb. Artıq Naxçıvan şahmatçıları müxtəlif beynəlxalq yarışlarda, dünya və Avropa çempionatlarında uğurla çıxış edirlər.

“Naxçıvan-2015” Beynəlxalq Şahmat Festivalının təşkilatçılarına təşəkkürünü bildirən Ali Məclisin Sədri iştirakçılara uğurlar arzulayıb və festivalı açıq elan edib.

Azərbaycan Respublikası gənclər və idman nazirinin müavini İsmayıl İsmayılov çıxış edərək deyib ki, Prezident İlham Əliyevin diqqət və qayğısı ilə Azərbaycanda bədən tərbiyəsi və idmanın inkişafı sahəsində kompleks tədbirlər həyata keçirilir, ölkəmizin idman nüfuzu artır. Bu gün Azərbaycanda idmanın bütün növlərinin, o cümlədən şahmatın inkişafı sahəsində ardıcıl tədbirlər görülür. Qəbul edilən dövlət proqramı şahmatın kütləvi hal almasına, istedadlı şahmatçıların yetişməsinə səbəb olub. İsmayıl İsmayılov Naxçıvan Muxtar Respublikasında da idmanın bütün növlərinin, o cümlədən şahmatın inkişafı sahəsində həyata keçirilən tədbirlərdən bəhs edib, festival iştirakçılarına uğurlar arzulayıb.

Tədbirdə çıxış edən beynəlxalq dərəcəli hakim, Şahmat Festivalının baş hakimi Faiq Həsənov qeyd edib ki, ölkəmizdə, o cümlədən Naxçıvanda şahmatın inkişafı və kütləviliyinin təmin olunması istiqamətində ardıcıl tədbirlər həyata keçirilir. Muxtar respublikada şahmat infrastrukturunun müasirləşdirilməsi, şahmatçıların fəaliyyətinin dəstəklənməsi peşəkar idmançılar nəslinin yetişməsinə səbəb olub. Artıq naxçıvanlı şahmatçılar ölkəmizdə və dünyada keçirilən yarışlarda uğurla çıxış edirlər. Faiq Həsənov muxtar respublikada şahmatın inkişafı sahəsində həyata keçirilən tədbirlərə görə minnətdarlıq edib.

Sonra festivalın püşkü atılıb.

“Naxçıvan-2015” Beynəlxalq Şahmat Festivalında 13 ölkədən 350-dən çox şahmatçı iştirak edir. Festival üç yarımqrupda keçiriləcək. Şəxsi əmsallarına görə “A” qrupunda 67, “B” qrupunda 116 və “C” qrupunda 176 şahmatçı 9 turda mübarizə aparacaq. Festivalda dünya və Avropa çempionu olmuş şahmatçılar, beynəlxalq qrossmeysterlər, beynəlxalq şahmat və FİDE ustaları iştirak edir. Ölkəmizi festivalda 303 şahmatçı təmsil edir ki, onlardan 80-i Naxçıvan Muxtar Respublikasından olan şahmatçılardır.

Tədbirin bədii hissəsində Naxçıvan Dövlət Filarmoniyasının Kamera Orkestri konsert proqramı ilə çıxış edib.

Sonra Naxçıvan şəhərindəki Şahmat Mərkəzində “Naxçıvan-2015” Beynəlxalq Şahmat Festivalı start götürüb.

Naxçıvanda Ulu Öndərin anadan olmasının ildönümünə həsr olunmuş beynəlxalq şahmat festivallarının keçirilməsi xarici ölkələrin dövlət rəsmiləri və beynəlxalq idman təşkilatlarının rəhbərləri tərəfindən maraqla qarşılanır. Beynəlxalq Şahmat Federasiyasının prezidenti Kirsan İlümjinov və Rusiya Federasiyası Dövlət Dumasının deputatı Dmitri Savelyev “Naxçıvan-2015” Beynəlxalq Şahmat Festivalının keçirilməsi ilə əlaqədar təbriklərini göndərib, bu beynəlxalq yarışın şahmatın inkişafına mühüm töhfələr verəcəyinə əminliklərini bildiriblər.

X X X

Həmin gün Naxçıvan Muxtar Respublikası Ali Məclisinin Sədri Vasif Talıbov “Naxçıvan-2015” Beynəlxalq Şahmat Festivalının iştirakçıları ilə görüşüb.

Ali Məclisin Sədri deyib ki, ilk dəfə 2003-cü ildə muxtar respublikada 20 yaşadək gənclər arasında şahmat üzrə dünya çempionatı keçirilib. Bundan sonra muxtar respublikada şahmatın inkişafı və beynəlxalq yarışların təşkili sahəsində ardıcıl tədbirlər görülüb. Beş ildir ki, Naxçıvanda Ulu Öndərin anadan olmasının ildönümü münasibətilə ənənəvi beynəlxalq şahmat festivalı keçirilir. Bu festival dünya şahmatçıları və şahmatsevərləri tərəfindən böyük maraqla qarşılanır.

Naxçıvanda şahmatın inkişafı sahəsində görülən işlərdən danışan Ali Məclisin Sədri qeyd edib ki, muxtar respublikada şahmatın inkişafına hərtərəfli dövlət qayğısı göstərilir. İstər şahmat məktəblərində, istərsə də ümumtəhsil məktəblərində şahmatın tədrisinə xüsusi diqqət yetirilir. Festivaldan bir gün öncə Kəngərli rayonunda Uşaq-Gənclər Şahmat Məktəbi üçün yeni bina istifadəyə verilib. Şahmatın inkişafına göstərilən qayğının nəticəsidir ki, bu gün muxtar respublika şahmatçıları arasında 1 beynəlxalq qrossmeyster, 1 beynəlxalq hakim və 1 FİDE ustası var.

Ali Məclisin Sədri beynəlxalq səviyyəli şahmatçıların Azərbaycan xalqının ümummilli lideri Heydər Əliyevin anadan olmasının ildönümünə həsr olunmuş şahmat festivalında iştirak etməsini dahi rəhbərin şəxsiyyətinə hörmət və ehtiramın ifadəsi kimi dəyərləndirib, onların hər birinə qələbə arzulayıb.

Beynəlxalq dərəcəli hakim, Şahmat Festivalının baş hakimi Faiq Həsənov və beynəlxalq qrossmeyster Zeynəb Məmmədyarova səmimi qəbula görə şahmat festivalının iştirakçıları adından minnətdarlıq edib, muxtar respublikada şahmatın inkişafı sahəsində görülən işlərin nümunə göstərilməyə layiq olduğunu bildiriblər.

Sonda Ali Məclisin Sədri şahmatçılarla xatirə şəkli çəkdirib.