NAXÇIVAN MUXTAR RESPUBLİKASI ALİ MƏCLİSİNİN SESSİYASI KEÇİRİLMİŞDİR
Sessiyada Naxçıvan Muxtar Respublikasının insan hüquqları üzrə müvəkkilinin (Ombudsmanın) seçilməsi, Ali Məclis sədrinin fərmanlarının təsdiq edilməsi haqqında məsələlər müzakirə edilmişdir.
Naxçıvan Muxtar Respublikası Ali Məclisinin sədri Vasif Talıbov muxtar respublika Konstitusiyasının 5-ci maddəsinə uyğun olaraq, insan hüquqları üzrə müvəkkilin (Ombudsmanın) seçilməsi üçün təqdimat vermişdir. Təqdimatda həmin vəzifəyə 1968-ci il təvəllüdlü, Naxçıvan Şəhər İcra Hakimiyyəti hüquq şöbəsinin müdiri Bayramova Ülkər İmanqulu qızının namizədliyi irəli sürülmüşdür. Deputatlardan Hüseyn Həşimli, Məmməd Rzayev, Anar İbrahimov, Oruc Həsənli, Azərbaycan Respublikası Milli Məclisinin deputatı İsa Həbibbəyli irəli sürülən namizədi müdafiə etməyə çağırmışlar.
Ülkər Bayramovaya yekdilliklə Naxçıvan Muxtar Respublikasının İnsan hüquqları üzrə müvəkkil (Ombudsman) seçilmişdir.
Ülkər Bayramova Ali Məclisdə and içmiş və etimadı ləyaqətlə doğruldacağını bildirmişdir.
Sessiyada Naxçıvan Muxtar Respublikası Ali Məclisi sədrinin fərmanları təsdiq edilmişdir.
Bununla da üçüncü çağırış Naxçıvan Muxtar Respublikası Ali Məclisinin üçüncü sessiyası öz işini başa çatdırmışdır.
Bölmənin digər xəbərləri
