Naxçıvanda “Kanal-35” televiziyasının yaradılması ulu öndər Heydər Əliyevin xatirəsinə sonsuz ehtiramın ifadəsidir
Naxçıvan, 15 iyul (AZƏRTAC, Rauf Əliyev). Naxçıvan şəhərində “Kanal-35” televiziyasının fəaliyyətə başlamasının onuncu ildönümü qeyd edildi.
AZƏRTAC xəbər verir ki, tədbirdən əvvəl Naxçıvan Muxtar Respublikası Rabitə və İnformasiya Texnologiyaları Nazirliyinin və televiziyanın əməkdaşları ulu öndər Heydər Əliyevin Naxçıvan şəhərinin baş meydanındakı abidəsi önünə gül dəstələri qoyaraq, əziz xatirəsinə dərin ehtiramlarını bildirdilər və Heydər Əliyev Muzeyini ziyarət etdilər.
Naxçıvan Muxtar Respublikası Rabitə və İnformasiya Texnologiyaları Nazirliyində keçirilən tədbirdə əvvəlcə televiziyanın on illiyindən bəhs edən film nümayiş olundu.
Naxçıvan Muxtar Respublikasının rabitə və informasiya texnologiyaları naziri Rövşən Məmmədov “Kanal-35” televiziyasının uğurla fəaliyyət göstərdiyini qeyd edərək televiziya əməkdaşlarını yubiley münasibətilə təbrik etdi.
Naxçıvan Muxtar Respublikası Rabitə və İnformasiya Texnologiyaları Nazirliyi Radio-Televiziya Ötürücü Mərkəzinin rəisi Rəşad Həsənov telekanalın yaranma tarixi barədə məlumat verdi. Bildirdi ki, “Kanal-35” televiziyası ümummilli liderimiz Heydər Əliyevin siyasi hakimiyyətə gəlişinin 35 illiyi münasibətilə 2004-cü ilin iyulun 14-də Naxçıvan Muxtar Respublikası Rabitə və İnformasiya Texnologiyaları Nazirliyinin Radio-Televiziya Ötürücü Mərkəzinin nəzdində fəaliyyətə başlayıb. Bu tarix bizə ona görə əzizdir ki, 1969-cu ilin bu günü ümummilli lider Heydər Əliyev Azərbaycanda siyasi hakimiyyətə gəlib. Dahi rəhbərin hakimiyyətə gəlişi ilə ölkəmizdə milli, mədəni, iqtisadi, siyasi yüksəlişin təməli qoyuldu. Bu baxımdan “Kanal-35” televiziyasının yaradılması Ulu Öndərin xatirəsinə sonsuz ehtiramın ifadəsidir.
Qeyd olundu ki, müasir texniki avadanlıqlarla təchiz edilmiş “Kanal-35” televiziyası fəaliyyətinə 10 saatlıq efir vaxtı ilə başlayıb. Sonra bu müddət 14 saatlıq yayıma qədər artırılıb.
2008-ci il yanvarın 1-dən “Kanal-35” televiziyasının və “Naxçıvanın səsi” radiosunun vahid mərkəzdən idarə edilməsi məqsədilə Radio-Televiziya Ötürücü Mərkəzinin nəzdində televiziya və radio verilişləri redaksiyası yaradılıb. Həmin ildən “Kanal-35” televiziyasının arxivindəki əcnəbi dillərdə olan materialların tərcüməsinə başlanılıb. Efirdə yalnız Azərbaycan dilində olan bədii, sənədli, elmi-kütləvi və televiziya filmlərinin nümayişinə nail olunub. 2008-ci ilin yanvar ayından bu günədək redaksiya tərəfindən 605 adda film tərcümə edilmiş, onlardan 597-si dublyaj olunaraq yayımlanıb.
Radio-Televiziya Ötürücü Mərkəzinin nəzdində televiziya və radio verilişləri redaksiyasının baş redaktoru İlkin Rzayev çıxışında dedi ki, bu gün televiziyanın əsas prioritet yayım prinsipləri elmi-publisistik verilişlərin, maarifləndirici informasiyaların, məlumatlandırıcı xarakterə malik filmlərin yayımının həyata keçirilməsidir. İlk yayım dövründən başlayaraq öz fəaliyyətini bu prinsip üzərində quran televiziya muxtar respublika teleməkanında böyük tamaşaçı auditoriyası qazanmışdır.
Bildirildi ki, ötən müddət ərzində televiziyanın arxiv fondunun təkmilləşdirilməsi sahəsində də ciddi işlər görülüb, xüsusi arxiv proqramı vasitəsilə videomaterialların qeydiyyatı və tənzimlənməsi həyata keçirilib.
Sonda Naxçıvan Muxtar Respublikası Ali Məclisi Sədrinin 2014-cü il iyulun 12-də imzaladığı Sərəncamla səmərəli fəaliyyətlərinə görə təltif edilmiş televiziyanın əməkdaşları Yaqub İsayevə, Seymur Məmmədova və İlkin Rzayevə “Rəşadətli əməyə görə” nişanları təqdim olundu.
Təltif edilənlər əməklərinə verilən yüksək qiymətə görə Ali Məclisin Sədrinə minnətdarlıqlarını bildirdilər.
Bölmənin digər xəbərləri
