Nazim Hacıyev: Hollivudda çəkdiyimiz film insanlıq yaddaşını sənət vasitəsilə canlandıracaq - MÜSAHİBƏ
İstanbul, 7 avqust, Günel Karatepe, AZƏRTAC
Türkiyənin Çorum vilayətinin Boğazkale rayonunda yerləşən və 8 min illik tarixə malik Hattuşa Antik Şəhərində, 119 il əvvəl başlanan arxeoloji qazıntılar hələ də davam edir.
Türkiyəli professor Feridun Tuna Hattuşa arxeoloji qazıntıları zamanı günümüzdən təxminən 3350 il əvvələ, yəni Hett dövrünə aid bir məzarda küplərin içində daş kitabə aşkarlayır. Bu kitabə əsasında türkiyəli arxeoloq, professor Ahmet Çelik “Hattuşaziti: Hattuşalı adam, Anadoludan eski bir elçi” adlı tarixi romanı qələmə alır.
Hazırda Hollivudun qlobal miqyasda ən təsirli layihələrindən bəzilərinə imza atmış, “Avatar” film şirkətinin prodüserlərindən biri olan tanınmış rejissor və prodüser Shavn Anthony Sequeiranın marağına səbəb olan bu əsər əsasında “SAS Movie Studios” tərəfindən “Hattuşalı adam” adlı tarixi epik filmin hazırlıqlarına start verilib.
Hititlər dövründə baş verən hadisələri əks etdirən bu roman, Firon Tutanhamonun ölümündən sonra, onun dul qalan xanımı, Misir kraliçası Ankhesenamenin, Hitit hökmdarı I. Şuppiluliumaya müraciət edərək ondan oğullarından birini özünə ər göndərməsini istədiyi tarixi məqamı canlandırır. Hökmdar bu müraciətin doğruluğunu araşdırmaq üçün elçi Hattuşazitini (Hattuşalı adam) Misirə göndərir və bununla da dramatik hadisələr zənciri başlayır.
Professor Ahmet Çelikin ssenarisi əsasında çəkiləcək filmdə əslən azərbaycanlı, Emmy mükafatlı rəssam və rejissor Nazim Hacıyev rejissor, baş rəssam və sənət rəhbəri kimi iştirak edir.
Nazim Hacıyev layihə ilə bağlı AZƏRTAC-a eksklüziv müsahibə verib.
-Nazim müəllim, tezliklə çəkilişlərinə start veriləcək “Hattuşaziti: Hattuşalı adam” adlı tarixi-bədii filmin rejissorlarından biri olaraq, bu layihənin mahiyyəti barədə oxucularımıza məlumat verərdiniz.
-Bu film mənim üçün olduqca xüsusi və mənalı bir layihədir. “Hattuşaziti: Hattuşalı adam”- qədim Anadolu torpaqlarının yaddaşını, Hitit sivilizasiyasının zəngin irsini beynəlxalq auditoriyaya çatdıracaq. Film, tarix, arxeologiya və insanlıq yaddaşını sənət vasitəsilə canlandıran epik bir əsər olacaq. Bu, sadəcə film deyil, həm də keçmişin bu günlə təmas nöqtəsidir.
-Filmin ssenarisi kimə məxsusdur və bu ideyanın yaranmasına nə səbəb oldu?
-Ssenari tamamilə professor Ahmet Çelikə məxsusdur. O, filmin əsasını təşkil edən romanın da müəllifidir. Ahmet Çelik arxeoloq və yazıçı kimi tarix elmini ədəbi düşüncə ilə birləşdirə bilən nadir simalardandır. Bu əsər, illərlə aparılmış tədqiqatların və şəxsi təcrübələrin məhsuludur. Ssenarini də o özü, peşəkar və dərin yanaşma ilə qələmə alıb.
-Siz bu layihədə konkret olaraq hansı vəzifələri icra edirsiniz?
-Filmdə bir neçə funksiyanı eyni anda yerinə yetirirəm, yəni, rejissor, baş rəssam və sənət rəhbəri kimi. Vizual dilin qurulması, estetik məkanların, kostyumların və səhnə kompozisiyalarının hazırlanması mənim məsuliyyətimdədir. Ahmet Çeliklə birgə rejissorluq işini də bölüşürük. Əsas məqsədimiz həm tarixi doğru təqdim etmək, həm də tamaşaçını vizual olaraq inandırmaqdır.
-Layihə üzərində hansı yaradıcı komanda çalışır?
-Film “Turkish Production” və “SAS Movie Studios” tərəfindən istehsal olunur. Prodüserlər Zülfü Çelik və Hollivudun tanınmış simalarından Shavn Anthony Sequeira layihəyə böyük dəstək verirlər. Vizual effektlərdən tanınmış mütəxəssis Oğuzhan Ceylan, əlaqə və sosial media işlərindən Metin Çorabatır və İsmail Uğur cavabdehdirlər. Layihənin icraçı direktor müavini Olga Amraic, elmi və ssenari rəhbəri professor Ahmet Çelik, ictimai-siyasi məsləhətçisi isə Türkiyə Böyük Millət Məclisinin sabiq deputatı Zülfü Demirbağ, Beynəlxalq Avrasiya Mətbuat Fondunun (BAMF) təsisçisi və prezidenti Umud Mirzəyev, Qəzənfər Niftəliyev və Nigar Ağayevadır. İncəsənət komandasında isə rəssam assistenti Yusuf Məmmədov və heykəltaraş İlqar Sultanov yer alırlar. Bu, əslində, yalnız bir film komandası deyil, bu, tarixi yenidən dirçəltməyə çalışan yaradıcı simaların birliyidir.
-Filmin hazırlıq prosesi hansı mərhələdədir?
-Hazırda tam hazırlıq mərhələsindəyik. Ssenari artıq tamamlanıb, prodüksiyon planları hazırlanıb. Çəkiliş məkanları araşdırılır, kostyum eskizləri və rəqəmsal ssenari cədvəli (storyboard) üzərində işlər aparılır. Çəkilişlərə yaxın zamanda başlanacaq. Proses tam olaraq ciddi və peşəkar şəkildə idarə olunur.
-Bu filmin dünya, o cümlədən türk kinosunda hansı yeri tutacağını düşünürsünüz?
-Əslində bu film türk kino tarixində yeni bir səhifə açacaq. Arxeoloji əsaslı, Anadolu mədəniyyətini epik şəkildə əks etdirən filmlər demək olar ki, yoxdur. Biz bu boşluğu həm yerli, həm də beynəlxalq səviyyədə doldurmaq istəyirik. Hollivudda belə mövzuda filmlər nadir hallarda çəkilir və biz bunu həm yerli zənginlik, həm də qlobal baxışla birləşdiririk. Filmin həm sənət, həm də tarix baxımından önəmli iz qoyacağına inanıram.
-Son olaraq, bu film sizin üçün mənəvi baxımdan nə ifadə edir?
-Bu film mənim üçün bir ömürlük məsuliyyətdir. Burada yalnız bir obrazın deyil, bütün bir mədəniyyətin, tarixi yaddaşın, kimliyimizin əksi var. “Hattuşalı adam” bir xalqın yaddaşıdır. Biz bu yaddaşı sənət vasitəsilə yaşatmalı və gələcək nəsillərə ötürməliyik. Sənət, tarixin nəfəs aldığı ən güclü vasitədir. Əlavə olaraq bir şəxsi düşüncəmi də bölüşmək istərdim. Mən nə arxeoloq, nə də tarixçiyəm. Lakin qəlbimdə elmi dəlillərlə izah edə bilməyəcəyim, dərin instinktiv bir hiss var. O hiss mənə deyir ki, Massagetlər, yəni bugünkü Azərbaycan, Türkmənistan, Qazaxıstan, Qırğızıstan və Türkiyə ərazilərində izi qalan qədim tayfalar–Hititlərlə tarixi baxımdan iç-içə, paralel bir mədəni qat təşkil edir. Bu fikrə indi dərindən toxunmaq istəmirik. Lakin, komandamızla birgə növbəti layihəmizdə bu xətt üzrə daha dərin, elmi əsaslı və arxeoloji baxımdan zəngin bir film hazırlamaq qərarına gəlmişik.
Qeyd edək ki, Anadolunun ilk sivilizasiyalarından olan Hatti və Hettlərin mədəni irsini özündə cəmləşdirən, e.ə. VI minilliklərə qədər uzanan izlər daşıyan Hattuşa Tarixi Yeri, UNESCO-nun Dünya Mədəni İrsi və Dünya Yaddaşı siyahılarında yer alır.
Bölmənin digər xəbərləri
