Nazir: “Üfüq” proqramı kənd təsərrüfatında insan resurslarının inkişafına xidmət edir
Bakı, 22 iyun, AZƏRTAC
“Üfüq” Karyera İnkişaf Proqramı Kənd Təsərrüfatı Nazirliyində çalışan peşəkar və liderlik potensialı olan əməkdaşların aşkara çıxarılması, onların inkişaf etdirilməsi və kadr ehtiyatı bazasının formalaşdırılması baxımından xüsusi əhəmiyyət daşıyır.
AZƏRTAC xəbər verir ki, bu sözləri kənd təsərrüfatı naziri Məcnun Məmmədov nazirliklə “Yüksəliş” İctimai Birliyi arasında imzalanmış əməkdaşlıq memorandumuna əsasən həyata keçirilən "Üfüq" Karyera İnkişaf Proqramının final mərhələsində jurnalistlərə müsahibəsində deyib.
“Bu il ilk dəfə keçirilən proqramın birinci mərhələsində 2771 əməkdaş qeydiyyatdan keçib. Namizədlərin əsas tələbləri ali təhsilli olmaları və nazirlikdə işləmələridir. İkinci mərhələdə uğur əldə etmiş 1331 namizəd növbəti mərhələyə yüksəlib. Üçüncü mərhələdə keçirilən qabiliyyət imtahanları nəticəsində isə 205 nəfər final mərhələsinə keçid hüququ əldə edib”, – deyə nazir diqqətə çatdırıb.
Məcnun Məmmədov vurğulayıb ki, bu yanaşma onların gələcəkdə Kənd Təsərrüfatı Nazirliyində daha yüksək vəzifələrə irəliləməsinə və sektorun idarə olunmasında fəal rol oynamalarına zəmin yaradacaq.
Bölmənin digər xəbərləri
