NAZİRLƏR KABİNETİNDƏ QƏBUL
Artur Rasizadə qonaqları salamlayaraq, görkəmli dövlət xadimi, xalqımızın ümummilli lideri Prezident Heydər Əliyevin xatirəsini yad etdiklərinə görə onlara təşəkkürünü bildirdi. O xatırlatdı ki, Heydər Əliyev ilə vidalaşmaq və onun dəfn mərasimində iştirak etmək üçün Gürcüstandan Bakıya böyük nümayəndə heyəti gəlmişdi. Həmin gün Gürcüstanın sabiq Prezidenti Eduard Şevardnadze, prezidentin səlahiyyətlərini yerinə yetirən Nino Burcanadze və digər rəsmi şəxslər Azərbaycanın ümummilli lideri ilə vidalaşdılar.
Baş nazir bildirdi ki, Azərbaycan qardaş Gürcüstanda hadisələrin gedişini diqqətlə izləyir və bu, əsrlərdən bəri dostluq və mehriban qonşuluq şəraitində yaşayan xalqlarımız arasındakı xüsusi münasibətlərdən irəli gəlir.
Artur Rasizadə dedi: “Prezident Heydər Əliyevin dövründə bünövrəsi qoyulan qarşılıqlı anlaşma və əməkdaşlıq siyasəti dəyişməz qalacaqdır. Ona görə də Gürcüstan tərəfi əmin ola bilər ki, bu siyasət davam etdiriləcəkdir. Azərbaycan Gürcüstanın demokratik, tərəqqi edən ölkə olmasını istəyir, çünki bütün regionda sabitlik bundan da asılıdır”.
Baş nazir ölkəmizdə aparılan iqtisadi islahatlardan, ümumi daxili məhsulun ildən ilə artmasından və ötən on bir ayda bunun 10,9 faiz təşkil etməsindən danışaraq vurğuladı ki, bütün bunlarla yanaşı, Dağlıq Qarabağ münaqişəsinin hələ də həll olunmaması, ərazilərimizin 20 faizinin işğal altında qalması, bir milyon vətəndaşımızın öz torpağında qaçqın və məcburi köçkünə çevrilməsi Azərbaycan üçün başlıca problem olaraq qalır. Problemin ədalətlə həlli işində Ermənistanın konstruktiv mövqe tutmaması Azərbaycanın və ümumən, bütün regionun daha uğurlu inkişafına əngəl törədir.
Gürcüstanın dövlət naziri Zurab Jvaniya səmimi qəbula görə təşəkkürünü bildirərək, Prezident Heydər Əliyevin dəfn mərasiminə obyektiv səbəblər üzündən gələ bilmədiyindən təəssüfləndiyini söylədi. O, Azərbaycan-Gürcüstan münasibətlərinin inkişafında Heydər Əliyevin rolundan söhbət açaraq dedi: “Heydər Əliyev Azərbaycanın müstəqilliyi kimi, Gürcüstanın müstəqilliyinin təşəkkülündə də böyük rol oynamışdır. Bundan əlavə, Eduard Şevardnadze ilə birlikdə o, ölkələrimiz arasında münasibətlərin yeni təməlini qoymuşdur”.
Zurab Jvaniya regiondakı münaqişələrdən danışarkən vurğuladı ki, onların həll edilməməsi, həqiqətən, bütün regionun inkişafına əngəl törədir.
Qəbulda Baş nazirin birinci müavini Yaqub Eyyubov, Gürcüstanın xarici işlər naziri Tedo Caparidze, Gürcüstanın Azərbaycandakı səfiri Zurab Qumberidze, digər rəsmi şəxslər iştirak edirdilər.
Bölmənin digər xəbərləri
