DÜNYA
NBC: Baydenin köməkçiləri onun seçicilərlə ünsiyyətini məhdudlaşdırır
![NBC: Baydenin köməkçiləri onun seçicilərlə ünsiyyətini məhdudlaşdırır](/files/2024/1/1200x630/17107479491371841231_1200x630.jpg)
Bakı, 18 mart, AZƏRTAC
ABŞ Prezidenti Cozef Bayden seçicilərlə ünsiyyətini məhdudlaşdıran köməkçilərinə qəzəblənib.
AZƏRTAC xəbər verir ki, NBC telekanalı bu barədə öz mənbələrinə istinadla məlumat yayıb.
Telekanalın məlumatına görə, Cozef Bayden daha çox tədbirlər keçirmək və seçicilərlə üz-üzə görüşmək istəsə də, köməkçiləri çıxışında səhvə yol verəcəyindən ehtiyatlanaraq bunun qarşısını almağa çalışırlar.
Mənbələrin iddiasına görə, əhali ilə daim ünsiyyətdə olmağa öyrəşən ABŞ prezidenti köməkçilərinin yaratdığı məhdudiyyətləri özünün təbii instinktlərinə zidd hesab edir.
Qeyd edək ki, Birləşmiş Ştatların 81 yaşlı dövlət başçısı ictimai çıxışlarında tez-tez müxtəlif səhvlərə yol verir. Respublikaçılar bunu əsas gətirərək, prezidentin ölkəyə rəhbərlik etməsi üçün əqli və fiziki qabiliyyətini şübhə altına alır.