Növbəti il sosialyönlü xərclərin dövlət büdcəsində xüsusi çəkisi 41,1 faiz olacaq
Bakı, 20 noyabr, AZƏRTAC
Növbəti ilin dövlət büdcəsində sosialyönlü xərclər 2025-ci illə müqayisədə 236 milyon manat və ya 1,4 faiz çox olmaqla 17 milyard 146 milyon manat təşkil edir.
AZƏRTAC xəbər verir ki, bunu əmək və əhalinin sosial müdafiəsi naziri Anar Əliyev Milli Məclisin noyabrın 20-də keçirilən plenar iclasında deyib.
Nazir bildirib ki, sosialyönlü xərclərin dövlət büdcəsində xüsusi çəkisinin 41,1 faiz olması nəzərdə tutulur. Bu da son 7 ildə müvafiq istiqamətdə ayrılan vəsaitin həcminin 2,2 dəfə artımı deməkdir (7,8 milyard manatdan 17,1 milyard manata). Bununla yanaşı, 2026-cı ilin dövlət büdcəsində sosial müdafiə və sosial təminat xərclərinin 4 milyard 873 milyon manat həcmində olması proqnozlaşdırılır. Bu göstərici 2025-ci ilin proqnoz edilən göstəricisindən 121,2 milyon manat və ya 2,6 faiz çoxdur. Bu da son 7 ildə bu istiqamətdə ayrılan vəsaitin həcminin 2,1 dəfə 2,3 milyard manatdan 4,9 milyard manata artması deməkdir.
Bölmənin digər xəbərləri
