NTD basketbol komandasının prezidenti: Qazandığımız kubok bizim üçün çox böyük əhəmiyyətə malikdir
Bakı, 1 aprel, AZƏRTAC
“Bu kubok bizim üçün çox böyük əhəmiyyətə malikdir”.
AZƏRTAC xəbər verir ki, bu sözləri basketbol üzrə Azərbaycan Kubokunun finalında “Gəncə”yə 81:72 hesabı ilə qalib gələrək titulu qazanan NTD komandasının prezidenti Bəhram Abdinov klubun rəsmi saytına açıqlamasında deyib.
O, qələbə sayəsində tamamilə fərqli emosiyalar yaşadıqlarını bildirib: “Son üç ildə Azərbaycanda basketbol fərqli səviyyəyə çatıb. Əvvəlki iki mövsümdə həm çempionatda, həm də kubokda son anda dayanırdıq. Buna görə də bu qələbə bizim üçün çox vacibdir. Maraqlı olan budur ki, bu mövsümdə heç kim bizi ciddi qəbul etmirdi. NTD liqada A qrupunda sonuncu yerdədir. Bəzən belə olur. Biz komandamızı yenidən qurduq, oyunlara yaxşı hazırlaşdıq və layiqli şəkildə titulu qazandıq. Ən sevindirici məqam isə odur ki, heyətimizdə 16 yaşlı yerli uşaqlar da oynadı. Murad Babayev nə yarımfinalda, nə də finalda oynadı. Onun yerinə çıxış edən gənc oyunçular isə qələbəmizə böyük töhfə verdilər. Bu məni çox sevindirir”.
Bölmənin digər xəbərləri
