Nur-Sultanda 20 Yanvar faciəsinin ildönümü ilə əlaqədar onlayn videokonfrans keçirilib
Nur-Sultan, 20 yanvar, AZƏRTAC
Qazaxıstanın paytaxtı Nur-Sultanda 20 Yanvar faciəsinin 31-ci ildönümü ilə əlaqədar onlayn videokonfrans keçirilib.
Azərbaycanın Qazaxıstandakı Səfirliyi tərəfindən təşkil olunan videokonfransda paytaxtla yanaşı, bölgələrdəki Azərbaycan icmasının rəhbər şəxsləri və fəalları, Qazaxıstanın regionlardakı məclislərində təmsil olunan soydaşlarımız iştirak edib.
AZƏRTAC xəbər verir ki, tədbir 20 Yanvar faciəsindən bəhs edən qısametrajlı filmin nümayişi ilə başlayıb. Azərbaycanın Qazaxıstandakı səfiri Rəşad Məmmədov bildirib ki, videokonfransı təşkil etməkdə əsas məqsəd böyük qurbanlar bahasına əldə edilən müstəqilliyin necə əvəzsiz bir miras olduğunu bir daha xatırlatmaqdır.
Səfir qeyd edib ki, ən yeni tariximizin şərəfli səhifələrindən biri sayılan 20 Yanvar xalqımızın azadlıq və suverenlik uğrunda apardığı mübarizənin dönməzliyini bütün dünyaya nümayiş etdirib, milli azadlıq hərəkatının müstəqilliklə nəticələnməsində ciddi dönüş nöqtəsi olub.
Səfir çətin illərdə Azərbaycan ziyalılarının, xüsusilə ulu öndər Heydər Əliyevin cəsarətli mövqeyinin xalqın əzmkarlığında, haqsızlığa qarşı inamlı duruşunda böyük rol oynadığını vurğulayıb.
Diplomat qeyd edib ki, 1988-ci ildən erməni separatistlərinin başlatdığı təcavüzkarlıq aktlarına etiraz olaraq ərazi bütövlüyü uğrunda mübarizəyə qalxan dinc əhaliyə qarşı silahlı müdaxilə yüzlərlə günahsız insanın qətlə yetirilməsi və yaralanması ilə nəticələndi. Amma, Bakıda kütləvi şəkildə həyata keçirilən bu ağlasığmaz vandallıq aktı insanlarımızı ruhdan salmadı, əksinə, Azərbaycan xalqını ölkənin müstəqilliyi uğrunda daha da sıx birləşdirdi və gücləndirdi. Həmin hadisələr bir qəhrəmanlıq salnaməsinə çevrildi və müstəqilliyin nə qədər böyük bir dəyər olduğunu heç zaman silinməyəcək şəkildə yaddaşımıza həkk etdi. Müstəqilliyimiz, ərazi bütövlüyümüz uğrunda 30 ildən artıqdır davam edən mübarizəmiz nəhayət Prezident, Müzəffər Ali Baş Komandan İlham Əliyevin başçılığı ilə tariximizə qızıl hərflərlə həkk olunan 44 günlük Vətən müharibəsi və Zəfərlə nəticələndi.
Səfir həmin çətin günlərdə dövlətimiz və xalqımızla həmrəy olan, dəstək nümayiş etdirən xarici ölkələrdə yaşayan soydaşlarımıza və Qazaxıstandakı icma üzvlərinə Azərbaycan dövləti adından təşəkkürünü bildirib.
Videokonfransda icma fəalları 20 Yanvar hadisələrini müstəqillik tariximizin dönüş nöqtəsi və qəhrəmanlıq salnaməsi kimi xarakterizə ediblər.
Sonda səfir R.Məmmədov 10 noyabr tarixində Qazaxıstan Parlamenti Məclisinə və yerli qanunverici orqanlara seçkilərdə uğur qazanan soydaşlarımızı təbrik edib və onlara fəaliyyətlərində uğurlar arzuladı.
İlahə Əhmədova
AZƏRTAC-ın xüsusi müxbiri
Nur-Sultan
Bölmənin digər xəbərləri
