Oğuz-Qəbələ-Bakı su xəttində baş verən qəza aradan qaldırılıb
Bakı, 18 iyun, AZƏRTAC
Oğuz-Qəbələ-Bakı su kəmərinin 228-ci kilometrində baş verən qəza aradan qaldırılıb.
AZƏRTAC İri Şəhərlərin Birləşmiş Su Təchizatı Xidmətinin yaydığı məlumata istinadən xəbər verir ki, hazırda xəttin su ilə doldurulması prosesinə başlanılıb.
Qəza baş vermiş xəttə borunun zədələnmiş hissəsi xüsusi texnika vasitəsilə çıxarılaraq yeni boru ilə əvəzlənib. Su sızmaların qarşısını alınması məqsədilə boruların birləşmə yerlərində möhkəmləndirmə və hidroizolyasiya işləri aparılıb.
“Kəmər içməli su ilə doldurulduqdan sonra su Bakı şəhəri və Abşeron yarımadasının müvafiq anbarlarına ötürüləcək. Məhz bu prosesin ardından iyunun 20-i axşam saatlarından etibarən abonentlərin əvvəlki rejimlə su ilə təminatı həyata keçiriləcək. Xüsusilə diqqətə çatdıraq ki, irihəcmli magistral su kəmərlərində təmir-bərpa prosesində əsas vaxt aparan mərhələ - magistral kəmərin boşaldılması və yenidən doldurulması mərhələləridir. Hazırda Oğuz-Qəbələ-Bakı su kəməri ilə qidalanan ərazilərin alternativ mənbələr hesabına qrafikdən kənar su ilə təmin olunmasına çalışılır”, - deyə xidmətin yaydığı məlumatda bildirilir.
Bölmənin digər xəbərləri
