ÖLKƏ İQTİSADİYYATINA KREDİT QOYULUŞUNUN HƏCMİ 22,7 FAİZ ARTMIŞDIR

27.12.2003 [12:02]
Çap et
A⁺ A^-

Dekabrın 1-nə olan məlumata görə, Azərbaycan iqtisadiyyatına 3190,8 milyard manat kredit qoyulmuşdur. Milli Bankın mətbuat xidmətindən AZƏRTAC-a bildirmişlər ki, bu, cari il yanvarın 1-i ilə müqayisədə 22,7 faiz çoxdur. Kredit qoyuluşlarının 294,1 milyard manatı və ya 9,2 faizi vaxtı ötmüş kreditlərin payına düşür.

Dövlət bankları iqtisadiyyata 1320,8 milyard manat (41,4 faiz), özəl banklar 1511 milyard manat (47,4 faiz), qeyri-bank kredit təşkilatları 359,1 milyard manat (11,2 faiz) kredit qoymuşlar.

Xarici kapitalın iştirakı ilə yaradılmış banklar 476,8 milyard manat (ümumi kredit qoyuluşunun 14,9 faizi), 100 faizli xarici kapitalla fəaliyyət göstərən banklar isə 102,1 milyard manat (3,2 faiz) kredit vermişlər.

Kreditlərin 1103,1 milyard manatı (34,6 faizi) manatla, 2087,7 milyard manatı (65,4 faizi) valyuta ilə verilmişdir.

Kreditlərin 663,7 milyard manatı (20,8 faizi) dövlət sektoruna, 2527,1 milyard manatı (79,2 faizi) isə özəl sektora yönəldilmişdir.