Pakistanda Azərbaycan həqiqətlərinin dünya ictimaiyyətinə çatdırılmasında həmvətənlərimizin rolundan danışılıb
İslamabad, 19 oktyabr, AZƏRTAC
Azərbaycanın Pakistandakı səfirliyi Diasporla İş üzrə Dövlət Komitəsi ilə birgə bu ölkədə yaşayan Azərbaycan vətəndaşlarının fəaliyyəti, yaşadıqları bölgələrdə ölkəmizin mənafeyinin qorunması istiqamətində apardıqları işlərlə bağlı son məlumatları almaq, həmçinin onların qarşılaşdığı çətinlikləri və təklifləri dinləmək, problemlərin birgə həllini tapmaq, həmçinin Ermənistanın ölkəmizə qarşı başladığı növbəti təxribatı və hərbi təcavüzü barədə onları məlumatlandırmaq məqsədilə videokonfrans təşkil edib.
Azərbaycanın müstəqilliyinin bərpasının 29-cu ildönümünə həsr olunmuş “Müstəqilliyimizin möhkəmləndirilməsində və Azərbaycan həqiqətlərinin dünya ictimaiyyətinə çatdırılmasında xaricdə yaşayan həmvətənlərimizin rolu” mövzusunda videokonfrans ölkəmizin ərazi bütövlüyü uğrunda döyüşlərdə canlarını fəda etmiş şəhidlərimizin əziz xatirəsinin yad olunması, Ali Baş Komandanın rəşadətli Ordumuzun rəhbərliyi ilə qələbələrin daha da çox olması arzusu və çağırışı ilə başlayıb.
Videokonfransda çıxış edən səfir Əli Əlizadə Ermənistanın ölkəmizə qarşı növbəti hərbi təxribatı və hücumları haqqında son məlumatları həmvətənlərimizin diqqətinə çatdırıb.
Səfir Azərbaycan Prezidentinin “Biz birlikdə güclüyük” çağırışına Pakistanda yaşayan vətəndaşlarımızın yekdilliklə qoşulduğunu, hətta Pakistan vətəndaşlarının da daim dəstək verdiyini bildirərək, ölkəmizin bu vacib məqamda həmvətənlərimizin daha da sıx birləşməsinin və həmrəyliyin məmnunluqla qarşılandığını bildirib.
Ə. Əlizadə Azərbaycan həqiqətlərinin dünya ictimaiyyətinə çatdırılmasında mətbuatın və sosial şəbəkələrin önəmini vurğulayıb. Diplomat Ermənistanın təcavüzkar siyasətinin ifşa olunması, Azərbaycan həqiqətlərinin Pakistan ictimaiyyətinə çatdırılması, Azərbaycan-Pakistan dostluğunun daha da möhkəmləndirilməsi istiqamətində müxtəlif layihələrin, tədbirlərin keçirilməsinin, televiziya kanallarında verilişlərin yayımlanmasının, müsahibələrin verilməsinin Pakistanda yaşayan vətəndaşlarımızın da birgə səyləri ilə davam etdiriləcəyini bildirib, yaşadığı şəhərlərdə, o cümlədən sosial şəbəkələrdə daha da fəallıq nümayiş etdirərək, ölkəmizin haqq səsinin dünya ictimaiyyətinə müxtəlif dillərdə çatdırılmasının vacibliyini vurğulayıb.
Səfir ulu öndər Heydər Əliyevin “Mənim üçün öz həyatımdan, öz canımdan artıq Azərbaycanın müstəqilliyini qorumaq, onu saxlamaq, onu əbədi etməkdir” kəlamının daim qəlblərdə yaşayaraq bir nümunə olduğunu, ölkə hüdudlarından kənarda yaşamasına baxmayaraq, hər bir azərbaycanlının qəlbinin Azərbaycan, ölkəmizin Silahlı Qüvvələri ilə döyündüyünü bildirib, müstəqilliyimizin bərpası günü münasibətilə Pakistanda yaşayan həmvətənlərimizi təbrik edib.
Dövlət Komitəsi sədrinin birinci müavini Valeh Hacıyev Ermənistanın Azərbaycana qarşı növbəti hərbi təxribat və hücumlarından, Ermənistan ordusunun Gəncə və digər şəhərlərimizdə günahsız insanlara qarşı törətdiyi vəhşiliklərdən, Ali Baş Komandanın rəhbərliyi ilə Ordumuzun apardığı uğurlu əməliyyatlardan, dünya ölkələrindəki Azərbaycan diasporu üzvlərinin erməni təxribatlarına qarşı apardıqları fəaliyyətdən söhbət açıb. Azərbaycan-Pakistan əlaqələrinin səmimi dostluq və qardaşlığa əsaslandığını, Pakistanda yaşayan həmvətənlərimizin az olmasına baxmayaraq diaspor nümayəndələrinin aktivliyinin müşahidə edildiyini bildirən Valeh Hacıyev komitənin vətəndaşlarımıza istənilən dəstəyi göstərməyə hazır olduğunu diqqətə çatdırıb, videokonfransın keçirilməsi təşəbbüsünə görə Azərbaycanın Pakistandakı səfirliyinə təşəkkür edərək həmvətənlərimizə fəaliyyətlərində uğurlar arzulayıb.
Videokonfransda çıxış edən həmyerlilərimiz də ölkəmizin Prezidenti, Ali Baş Komandan İlham Əliyevin rəhbərliyi ilə torpaqlarımızın işğaldan azad olunması üçün aparılan əks-hücum əməliyyatlarının hər kəsdə qürur hissi və ruh yüksəkliyi yaratdığını, dünya və Pakistan ictimaiyyətinə Azərbaycanla bağlı həqiqətlərin çatdırılması istiqamətində fəaliyyəti daha da səylə aparmağa stimul verdiyini qeyd edib, belə səmərəli tədbirə görə təşəkkürlərini bildiriblər.
Sonda həmyerlilərimizi maraqlandıran suallar cavablandırılıb və təklif olunan məsələlərlə bağlı ümumi müzakirələr aparılıb.
Qulu Kəngərli
AZƏRTAC-ın xüsusi müxbiri
İslamabad
Bölmənin digər xəbərləri
