PARALİMPİYA OYUNLARININ MƏŞƏLİ YANDIRILDI
Antik mifologiyada şikəst (oğlan) kimi təsvir edilən od allahı və sənətkarların himayədarı Hefest həm də paralimpiyaçıların – irsi və ya sonradan qazanılmış fiziki şikəstliyi olan idmançıların “himayəçisidir”.
2004-cü ilin yay Olimpiya oyunları Təşkilat Komitəsinin sədri xanım İoanna Angelopulos-Daskalaki məbədin daxilində və Qədim aqoranın ərazisində – antik Afinanın mərkəzində təntənəli mərasim başa çatdıqdan sonra demişdir: “Olimpiya oyunlarının böyük uğurlarının əks-sədası bütün dünyada yayıldığı bir vaxtda biz bəşəriyyəti daha bir möhtəşəm idman hadisəsində iştiraka yenidən dəvət edirik. XII Paralimpiya oyunlarının məşəli yandırılmışdır!”.
Paralimpiya məşəlinin estafeti paytaxtın Attika vilayətinin 54 bələdiyyəsindən keçən marşrutla üzrə 410 km məsafə qət edərək, cəsurluğun, qətiyyətin və mərd-mərdanə mübarizənin rəmzinə çevriləcəkdir. Estafetin iştirakçıları arasında Yunanıstanın tanınmış əlil atletləri, Beynəlxalq Paralimpiya Komitəsinin və Əlillər üçün Milli İdman Federasiyasının üzvləri də var.
Paralimpiya oyunları sentyabrın 17-28-də Afinada keçiriləcəkdir. Oyunlarda 145 ölkənin, o cümlədən Azərbaycanın, təxminən 4 min əlil atleti iştirak edəcəkdir. Onlar idmanın 19 növü üzrə yarışlarda mübarizə aparacaqlar.
Bölmənin digər xəbərləri
