Parisdə AŞPA-nın monitorinq komitəsinin iclası keçirilib
Paris, 11 dekabr, AZƏRTAC
Dekabrın 11-də Avropa Şurasının Parisdəki ofisində AŞPA-nın monitorinq komitəsinin iclası keçirilib.
Komitə üzvləri Monteneqroda, Ukraynada, Serbiyada, Gürcüstanda, Bosniya və Herseqovinada vəziyyət, Monako ilə dialoq və digər məsələlərə dair müzakirələr aparıblar.
Azərbaycanın AŞPA-dakı nümayəndə heyətinin rəhbəri, Milli Məclisin beynəlxalq münasibətlər və parlamentlərarası əlaqələr komitəsinin sədri Səməd Seyidov yığıncaq barədə AZƏRTAC-a müsahibəsində deyib: “Azərbaycan nümayəndə heyətinin rəhbəri kimi Serbiya ilə bağlı məruzəmi təqdim etdim. Məruzədə Serbiyada gedən proseslər, Serbiya-Avropa münasibətləri barədə söhbət açılır. Qeyd etməliyəm ki, komitədə bu istiqamətdə çox ciddi müzakirələr oldu. Bununla yanaşı, Ukraynada mövcud vəziyyətlə bağlı geniş fikir mübadiləsi aparıldı. Çünki bu məsələ AŞPA üçün çətin bir problemə çevrilib. Rusiya ilə qonşuluq siyasəti geniş müzakirə edildi və ölkəmizin bu məsləyə dair mövqeyi bildirildi.
Ümumiyyətlə, monitorinq komitəsinin bu ilin sonuncu yığıncağında Azərbaycan nümayəndə heyətinin rəhbərinin Avropa ölkəsinin monitorinqi ilə bağlı fikir söyləməsi və bunun komitə tərəfindən tam dəstəklənməsi özlüyündə çox vacib və əhəmiyyətli məsələ idi”.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
