“PAŞA Holding” “Apple” şirkətinin qurucusunu Bakıya gətirir
Bakı, 16 avqust, AZƏRTAC
Noyabrın 30-da və dekabrın 1-də Bakıda "PAŞA Holding"in təşkilatçılığı ilə regionun ən böyük innovasiya sammiti olan "InMerge Innovation Summit" keçiriləcək.
Şirkətdən AZƏRTAC-a bildirilib ki, artıq 3-cü ildir təşkil olunan bu tədbir innovatorları, aparıcı texnologiya şirkətlərini, liderləri, startapları və eləcə də investorları bir araya gətirərək onlarla əlaqə yaratmaq, innovasiya ekosisteminə inteqrasiyalar etmək məqsədi daşıyır.
"InMerge Innovation Summit" tədbirində, həmçinin "Apple" şirkətinin qurucularından Steve Vozniak da iştirak edəcək. Günümüzün texnologiya sahəsində aparıcı şirkətlərdən biri "Apple"ı yaradan şəxslərdən olan Steve Bakıda keçiriləcək bu əhəmiyyətli tədbirdə texnologiya sahəsindəki yeniliklərdən, həmçinin öz işlərindən söz açacaq.
Tədbirdə "Trendyol" şirkətlər qrupunun prezidenti Çağlayan Çetin, "PAŞA Holding"in baş icraçı direktoru Cəlal Qasımov, məşhur TED spikeri Michael Ringel və sahəsində özünü təsdiq etmiş onlarla şəxs iştirak edəcək.
Sammitdə elektron ticarət, sığorta texnologiyaları, süni intellekt, telekommunikasiya və daha bir çox mövzuda təqdimatlar ediləcək, müzakirələr aparılacaq və seminarlar baş tutacaq.
İnnovasiya və texnologiya sahəsi üçün önəm kəsb edən bu tədbir üçün biletlər sentyabrın 10-dək 500 dollar yox, endirimlə 150 dollara təqdim olunur. Tədbir haqqında daha çox öyrənmək və bilet əldə etmək üçün inmerge.az veb-saytını ziyarət edə bilərsiniz.
Bölmənin digər xəbərləri
