Pedaqoji Universitet: Qəbul dövründə 8 milyondan çox baxış, 12 min 500-dək müraciət
Bakı, 12 sentyabr, AZƏRTAC
Tələbə qəbulu və elektron qeydiyyat prosesi müddətində Azərbaycan Dövlət Pedaqoji Universitetinin (ADPU) İctimaiyyətlə əlaqələr və marketinq şöbəsi tərəfindən abituriyentlərdən, tələbələrdən, həmçinin ictimaiyyət və media nümayəndələrindən daxil olan müraciətlərə çevik cavab verilməsi istiqamətində planlı iş aparılıb.
ADPU-dan AZƏRTAC-a bildirilib ki, xüsusilə abituriyentlər və onların valideynlərinin ixtisas seçimi, mövcud ixtisaslar, universitetin infrastrukturu və naviqasiyası, təqaüd imkanları, yataqxana, onlayn qeydiyyat, təhsil tələbə krediti və digər bu kimi məsələlərlə bağlı müraciətləri operativ şəkildə nəzərdən keçirilib və zəruri dəstək göstərilib.
İyunun 30-dan sentyabrın 11-dək universitetin sosial media hesablarında məlumat xarakterli 60 poster və videoməzmun paylaşılıb ki, bu məzmunlar rəsmi instaqram, feysbuk və linkedin səhifələri, teleqram, votsap və yutub kanalları vasitəsilə ümumilikdə 8 milyon 125 min dəfə izlənilib. Bu, paylaşımlara orta hesabla bir gün ərzində 112 min 847 dəfə baxılması deməkdir. Hesabat dövrü ərzində şöbə tərəfindən vətəndaşlardan müxtəlif əlaqə vasitələri ilə daxil olmuş ümumilikdə 12 min 453 müraciət operativ qaydada cavablandırılıb ki, bu da orta hesabla bir günə 173 müraciət deməkdir. Onlardan 10 min 199-u instaqram səhifəsi üzərindən, 1239-u votsap xəttindən, 356-sı feysbuk, linkedin, teleqram səhifələri və elektron poçt vasitəsilə, 609-u isə zəng formasında daxil olan müraciətlərdir.
Qeyd edək ki, ötən ilin analoji dövrü ərzində cavablandırılmış müraciətlərin ümumi sayı 5 min 356 təşkil edib ki, bu da ötən illə müqayisədə 132.5 %-dən çox artım deməkdir.
Onlayn qeydiyyatla bağlı universitetdə yerində müraciət xidmətinin təşkil edilməməsinə baxmayaraq, müraciət etmiş 50-dən çox vətəndaşa yerində xidmət göstərilib.
Şöbə tərəfindən ADPU-ya yeni qəbul olunmuş tələbələrin məlumatlandırılması və tədris prosesinə adaptasiyasına dəstək göstərilməsi istiqamətində işlər davam etdirilir.
Bölmənin digər xəbərləri
