Pekində hərarət 40 dərəcəni ötdü, şəhərdə “qırmızı” xəbərdarlıq elan edildi
Pekin, 6 iyul, AZƏRTAC
Çinin paytaxtı Pekində havanın hərarəti yenidən 40 dərəcəni ötüb.
AZƏRTAC xəbər verir ki, şəhər hökuməti bu səbəbdən ən yuxarı səviyyədə - “qırmızı” xəbərdarlıq elan edib. Bu, cari ildə anomal isti hava ilə əlaqədar Pekində ikinci analoji xəbərdarlıqdır. Şəhərdəki Nanciao meteorloji stansiyasının məlumatına görə, iyunun əvvəlindən bəri havanın temperaturu 18 gün 35 dərəcəni, 4 gün isə 40 dərəcəni ötüb. Stansiya 1951-ci ildən bəri ilk dəfədir ki, Pekində bu cür anomal isti qeydə alır. Paytaxtda bu cür hava şəraitinin iyulun 7-də də davam edəcəyi proqnozlaşdırılır.
Milli Meteorologiya Mərkəzi əhaliyə açıq hava fəaliyyətlərini təxirə salmağı, günvurma və istivurma hallarına hazır olmağı tövsiyə edib.
Qeyd edək ki, iyun ayından etibarən Çinin əsasən şimal hissəsində anomal isti hava müşahidə olunur. Bu dövrdə beş isti hava dalğası qeydə alınıb. Ümumiyyətlə, Çində son 60 ilin ən çoxsaylı isti günləri hökm sürür. Milli İqlim Mərkəzinin məlumatına əsasən, 40 dərəcə isti 200 milyon insanın yaşadığı bölgəni əhatə edir.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
