PEKİNDƏKİ SƏFİRLİYİMİZDƏ XATİRƏ GÜNÜ
Səfirlikdən AZƏRTAC-a bildirmişlər ki, tədbirə bir sıra ölkələrin Pekindəki səfirləri, Çin Xarici İşlər Nazirliyinin əməkdaşları, “Dostluq” Cəmiyyətinin və kütləvi informasiya vasitələrinin nümayəndələri dəvət olunmuşdular.
Səfir Yaşar Əliyev çıxışında ümummilli liderimiz Heydər Əliyevin xalqımızın və ölkəmizin tarixindəki rolu və misilsiz xidmətləri haqqında danışmış, dahi rəhbərin xatirəsinin qədirbilən Azərbaycan xalqının qəlbində daimi yaşayacağını vurğulamışdır.
Sonra rejissor Vaqif Mustafayevin Prezident Heydər Əliyevin həyat yoluna həsr olunmuş filmi nümayiş etdirilmişdir.
Filmin tamaşasından sonra qonaqlar ümummilli liderimiz haqqında təəssüratlarını bölüşmüşlər.
Rusiya Federasiyasının Pekindəki səfiri İqor Roqaçov vaxtilə SSRİ Xarici İşlər Nazirliyində çalışdığı zaman Heydər Əliyevlə birlikdə səfərlərə getdiyini xatırlamış, bu nəhəng şəxsiyyətin gördüyü işlərdən MDB ölkələrinin bir çoxunun indi də bəhrələndiyini vurğulamışdır.
Türkiyənin səfiri Rafet Akgünay türk dünyasının böyük oğlu Heydər Əliyevin dahi siyasi xadim olduğunu vurğulayaraq, filmdə onun nə qədər sadə, sevən və sevilən insan kimi gördüyünü söyləmişdir.
Tədbirin sonunda Pekin məscidinə ziyarət edilmiş, xalqımızın görkəmli övladının ruhuna dua oxunmuşdur.
Bölmənin digər xəbərləri
