Platinin qiyməti son 10 ilin maksimumuna çatıb
Bakı, 19 iyun, AZƏRTAC
Platinin qiymətləri son on ildən artıq müddətdə ilk dəfə rekord səviyyəyə yüksəlib. Bu artım qiymətli metalın çatışmazlığı fonunda baş verən tələbat sıçrayışı ilə əlaqədardır.
AZƏRTAC “Trading Economics”ə istinadla xəbər verir ki, spot qiymətlər 2 faizdən çox artaraq, hər unsiya üçün 1350,17 ABŞ dollarına çatıb. Bu, 2014-cü ilin sentyabr ayından bəri qeydə alınan ən yüksək göstəricidir.
Cari ilin əvvəlindən bəri platin 45 faiz bahalaşıb. Bu artımın əsas səbəbləri bazarda ciddi metal çatışmazlığı və zərgərlik məhsulları istehsalçıları tərəfindən ehtiyatların artırılmasıdır. Mütəxəssislər, həmçinin Asiya ölkələrindən, xüsusilə Çin və Hindistandan gələn tələbatın artdığını vurğulayırlar.
Yaxın Şərqdə gərginliyin artması da platinin alış həcmini artırıb. Digər qiymətli metallar kimi, platin də investorlar tərəfindən təhlükəsiz aktiv kimi istifadə olunur.
Bununla belə, “Goldman Sachs” qiymətlərin bir unsiyaya görə təxminən 800–1150 dollar səviyyəsinə qayıdacağını proqnozlaşdırır ki, bu da son onilliyin ticarət diapazonu hesab olunur.
Bölmənin digər xəbərləri
