Politoloq : Türk dünyası QHT Platformasının yaradılması ilə həmrəyliyini yeni səviyyəyə qaldırır
Bakı, 27 noyabr, Səbinə Əlizadə, AZƏRTAC
Bir neçə gün öncə Naxçıvan şəhərində Türk Dövlətləri Təşkilatına (TDT) üzv dövlətlərin QHT-lərinin həmrəylik forumu çərçivəsində Türk Dövlətləri Təşkilatına üzv ölkələrin QHT Platformasının təsis konfransı keçirildi. Beləliklə, TDT-yə üzv və müşahidəçi dövlətlərin vətəndaş cəmiyyətlərini birləşdirən platformanın əsası qoyuldu. Elə 16 il öncə, 2009-cu ildə sonradan TDT-yə çevrilən Türkdilli Dövlətlərin Əməkdaşlıq Şurasının əsası da məhz Naxçıvan şəhərində qoyulmuşdu. Uzaqgörən və müdrik siyasət yürüdən Azərbaycanın təşəbbüsü ilə yaradılan və artıq bütün dünyada vacib beynəlxalq platformalardan birinə çevrilməkdə olan bu təşkilat bütün Türk dünyasının möhkəm tellərlə daha sıx birləşməsi prosesini davam etdirir. Bu dəfə də təşəbbüs Azərbaycandan gəldi və bütün üzvlər, hətta müşahidəçilər tərəfindən böyük rəğbətlə qarşılandı.
Bunu AZƏRTAC-a açıqlamasında Siyasi və Hüquqi Araşdırmalar Mərkəzinin rəhbəri politoloq Xəyal Bəşirov səsləndirib.
O qeyd edib ki, 2003-cü ildə hakimiyyətə gələndə 86,6 min kvadratkilometr ərazisi olan Azərbaycanın ərazi bütövlüyü və suverenliyi problemini həll etmək missiyası uğrunda mübarizə aparan Prezident İlham Əliyev təxminən 20 il sonra artıq 4,7 milyon kvadratkilometr ərazisi, 200 milyona yaxın əhalisi və 1,2 trilyonluq ÜDM-ə sahib olan ölkələrin yerləşdiyi bütün türk coğrafiyasının birləşməsi üçün uğurlu siyasət aparır: “TDT-yə aid dövlətlərin vətəndaş cəmiyyətlərini təmsil edən QHT-lərin Həmrəylik Platformasının təsis edilməsi bu xüsusda çox uğurla düşünülmüş bir ideyanın reallaşdırılmasıdır. Biz bu təşkilatda təmsil olunan dövlətlərin bütün istiqamətlərdə, siyasi, diplomatik, iqtisadi, mədəni, dini, idman, hərbi və hətta vətəndaş cəmiyyəti təmsilçiləri sahəsində sıx birləşdiyini müşahidə etməkdəyik. Hesab edirəm ki, hazırkı sivil dünyada dövlətlər və xalqlar arasında sıx təmasların və əlaqələrin qurulmasına ən önəmli rola sahib olan qeyri-hökumət təşkilatları vasitəsilə böyük bir platformanın təsis edilməsi özü-özlüyündə TDT-nın məqsədlərini bir daha açıq bəyan edir. Biz böyük bir coğrafiyada sülh, əməkdaşlıq və həmrəylik naminə birləşmək niyyətindəyik. Bu birlik hansısa dövlətə və ya təsisata qarşı deyil, eyni tarixə, köklərə, mədəniyyətə, dinə və digər müqəddəs dəyərlərə sahib olan xalqların aid olduğu bu regionu birləşdirmək üçün yaradılıb. Artıq bu missiyanın QHT-lər vasitəsilə də həyata keçirilməsi ilə biz, Türk dünyası olaraq, niyyətimizi yalnız dövlətlər səviyyəsində rəsmi şəkildə deyil, həm də vətəndaş cəmiyyətləri vasitəsilə bütün dünyaya bəyan etmiş oluruq”.
Bölmənin digər xəbərləri
