Politoloq: Azərbaycanla Avropa İttifaqı arasında yüksək səviyyəli əməkdaşlıq var
Bakı, 20 iyul, AZƏRTAC
Ölkəmizin xarici siyasət strategiyası çoxvektorlu olmaqla yanaşı, milli maraqlarımızın təmin olunmasına yönəlib. Prezident, Müzəffər Ali Baş Komandan İlham Əliyev Azərbaycanın dövlət maraqlarını hər şeydən üstün tutur və milli mənafelərimizin müdafiəsini başlıca vəzifələrindən biri hesab edir.
Bu fikirləri AZƏRTAC-a açıqlamasında politoloq İlyas Hüseynov deyib.
Politoloq qeyd edib ki, Azərbaycanla Avropa İttifaqı arasında yüksək səviyyəli münasibətlər və əməkdaşlıq mövcuddur. Bu, dövlətimizin başçısının Avropa İttifaqı Şurasının Prezidenti Şarl Mişellə münasibətləri, qarşılıqlı səfərlər və yüksək səviyyəli dialoqda, sıx əməkdaşlığın real nəticələrində özünü aydın göstərir. Bununla yanaşı, Avropa Komissiyasının Prezidenti Ursula Fon der Lyayenin Azərbaycana səfəri, imzalanmış memorandum da ikitərəfli münasibətlərin yüksək səviyyəsini nümayiş etdirir.
“Xüsusi vurğulamaq lazımdır ki, dünyada gedən mühüm proseslər fonunda milli maraqlarımızın keşiyində dayanan Prezident İlham Əliyev Avropa Parlamentinin nümayəndə heyətini qəbul edərkən səsləndirdiyi tənqidi fikirlər bu qurumda zaman-zaman müxtəlif lobbi qruplarının ölkəmizə qarşı həyata keçirməyə çalışdığı təxribatlar, qəbul olunmuş qeyri-obyektiv sənədlərə münasibətdir. Nümunə kimi qeyd edə bilərik ki, bir müddət əvvəl Avropa Parlamentində erməni lobbisinin dəstəyi ilə guya Qarabağda “erməni mədəni irsinin dağıdılması” ilə bağlı qəbul olunmuş qətnamə tamamilə qərəzlidir və həqiqətə uyğun deyil. Əvvəlki dövrlərdə də belə sənədlər qəbul edilib və bu vasitə ilə Azərbaycana təsir göstərmək cəhdləri olub. Ümumiyyətlə qeyd etməliyik ki, ölkəmiz uzun müddətdir ikili standartlar siyasətindən əziyyət çəkir. Azərbaycan Avropa Parlamenti ilə də sağlam və qarşılıqlı faydalı əsasda münasibətləri inkişaf etdirməyə hazırdır. Amma bu qurum Aİ-Azərbaycan əlaqələrinin inkişafı yolunda problem olmamalıdır. O, ilk növbədə, ümumavropa maraqlarından çıxış etməli, Aİ-nin tərəfdaşları ilə konstruktiv münasibətlər formalaşdırmalı və əməkdaşlığı inkişaf etdirməlidir”, - deyə İ.Hüseynov vurğulayıb.
Bölmənin digər xəbərləri
