Politoloq: BMT Təhlükəsizlik Şurasındakı müzakirələr Ermənistan diplomatiyasının tam iflasa uğradığını göstərdi
Bakı, 17 avqust, AZƏRTAC
Ermənistan Azərbaycanla münasibətlərin normallaşması, sülh müqaviləsinin imzalanması üzrə aparılan prosesi pozmaq üçün addımlarını davam etdirir. Normallaşma istiqamətində müəyyən qədər yolun qət edildiyi və regionda sülhün əldə olunması real imkanlar yarandığı bir vaxtda rəsmi İrəvan yenə öz təxribatları ilə gərginlik yaratmaqla məşğuldur. Bir tərəfdən "humanitar böhran", "aclıq" şousu quran Ermənistan, digər tərəfdən Azərbaycan Ordusunun mövqelərini atəşə tutmaqla təxribatlarının miqyasını daha da genişləndirməyə çalışır.
Təəssüf ki, bəzi beynəlxalq oyunçular Ermənistanın təxribatlarını, pozuculuq fəaliyyətini, revanşizm siyasətini pisləmək əvəzinə, İrəvan hakimiyyətinin qurduğu tamaşada rol alırlar.
Azərbaycanın sülh prosesi, Qarabağ ermənilərinin reinteqrasiyası ilə bağlı mövqeyi bəllidir. Bu, dəfələrlə ən yüksək səviyyədə açıqlanıb. Rəsmi Bakının qeyd edilən məsələlərdə ortaya qoyduğu mövqe, təklifləri beynəlxalq normalara əsaslanır. "Aclıq", "Tır" şousu kimi pozucu planları ilə istədiyi nəticəni əldə edə bilməyən Ermənistan hakimiyyəti BMT Təhlükəsizlik Şurasına üz tutub və təcili iclasın çağırılmasını tələb edib. İrəvan ilk dəfə deyil ki, Azərbaycana qarşı bu addımı atır. İkinci Qarabağ müharibəsinin gedişində də belə cəhdlər edilib. Amma hər dəfə uğursuzluğa düçar olub. Çünki qeyd etdiyimiz kimi, Azərbaycan bu məsələlərdə tam haqlıdır və beynəlxalq hüquqa zidd olan hansısa addımı atmayıb.
Bu sözləri AZƏRTAC-a açıqlamasında politoloq İlqar Vəlizadə söyləyib.
Politoloq deyib ki, 2022-ci ilin dekabrında Fransa və Ermənistanın azərbaycanlıların Laçın yolundakı aksiyası ilə bağlı BMT Təhlükəsizlik Şurasının iclasını çağırmasını xatırladan politoloqun sözlərinə görə, məqsəd müzakirələrin yekunu olaraq Azərbaycana qarşı əvvəlcə bəyanatın, daha sonra isə qətnamənin qəbul edilməsi idi. Lakin bu, baş vermədi. Belə ki, Böyük Britaniya, Rusiya, BƏƏ və Albaniya əvvəldə Fransa tərəfindən hazırlanan bəyanata düzəlişlər etməyi istədilər, sonda bu ölkələrin qəti mövqeyi nəticəsində yekun mətn qəbul olunmadı.
“Ermənistan BMT Təhlükəsizlik Şurasının 1993-cü ildə qəbul etdiyi dörd qətnaməsini 30 ilə yaxın yerinə yetirməyən bir ölkədir. İşğalçı qüvvələrin Azərbaycan ərazisindən tam, dərhal və qeyd-şərtsiz çıxarılmasını tələb edən bu qətnamələr mövcud olduğu halda, BMT TŞ ötən illər ərzində Ermənistandan onların icrasını tələb etmədi. Həmçinin Ermənistanın Azərbaycana hərbi təcavüzü ilə bağlı məsələ qaldırmadı. Təəssüf ki, bəzi beynəlxalq qurumlar, o cümlədən BMT TŞ Ermənistanın əlində alətə çevrilib. Ermənistanın BMT Təhlükəsizlik Şurasına müraciəti normallaşma istiqamətində diplomatik səylərə ciddi zərbə vurur”, - deyə İ.Vəlizadə diqqətə çatdırıb.
Politoloq bildirib ki, uzun illər Təhlükəsizlik Şurasının və BMT Baş Assambleyasının qətnamələrinə məhəl qoymayan Ermənistan indi Qarabağ məsələsi ilə bağlı təcili iclasın keçirilməsini tələb edir. Maraqlıdır, Paşinyan hökuməti Təhlükəsizlik Şurasından hansı qərarın olmasına ümid edir? Ən yaxşı halda, media üçün bir açıqlama və ya sədrin mövcud problemlərin dialoq yolu ilə həll edilməsi, Qarabağ ermənilərinin təhlükəsizliyinin və humanitar ehtiyaclarının təmin edilməsi üçün tərəflərə müraciəti ola bilər. Deməli, Rusiyanın xarici işlər naziri Sergey Lavrovun son kompromis təklifinə uyğun olaraq, Təhlükəsizlik Şurasına getmədən bütün bunlara nail olmaq mümkün idi. Ermənilər bağladıqları Ağdam-Əsgəran yolunu istifadə etmək üçün açıb, Yevlaxda dialoqa gəlsəydilər, daha yaxşı olardı.
“Hesab edirəm ki, Paşinyan hökuməti İrəvanda seçkilər ərəfəsində seçicilərə Qarabağ erməniləri üçün əllərindən gələni etdiklərini nümayiş etdirməyə çalışır. Laçın postunun girişində düzülmüş humanitar karvan, BMT Təhlükəsizlik Şurasına müraciət də bu planın tərkib hissəsidir. Eyni zamanda, İrəvan Qarabağdakı qeyri-qanuni erməni qüvvələrinin tərk-silah edilməsi üzrə antiterror əməliyyatını təxirə salmaq üçün beynəlxalq ictimaiyyətin diqqətini regiondakı vəziyyətə yönəltməyə çalışır. Xarici siyasətdə Paşinyan və komandasının diplomatik və informasiya hiylələri çətin ki, dividend gətirsin, lakin onlar daxili siyasi məqsədlər üçün işləyə bilərlər. Heç bir, hətta ən səmərəli təşkil edilmiş informasiya səs-küyü Ermənistan-Azərbaycan münasibətlərinin aktual problemlərinin həllində əməli hərəkətləri əvəz edə bilməz”, - deyə politoloq vurğulayıb.
İlqar Vəlizadə qeyd edib ki, Ermənistanın bütün mümkün vasitələrdən Azərbaycanın əleyhinə istifadə etməsi cəhdlərinin sonu uğursuzdur. Vurğulanıb ki, indiyədək əleyhimizə olan bütün cəhdlər uğursuzluqla nəticələnib. Bu dəfə də elə oldu. Müzakirələrin nəticəsi beynəlxalq hüququn, haqq-ədalətin Azərbaycanın tərəfində olduğunu sübut etdi. Bu da təbii ki, Azərbaycanın beynəlxalq nüfuzunun göstəricisidir.
Politoloq əlavə edib ki, BMT TŞ-dəki müzakirələr Ermənistan diplomatiyasının tam iflasa uğradığını göstərdi. Ermənistanın, erməni diasporu və lobbisinin səyləri bu dəfə nəticəsiz qaldı. BMT tribunasından belə müzakirələrə ehtiyac olmadığı bir daha təsdiq olundu. Revanşist xülyalarla yaşayan ermənilərə başa saldılar ki, məsələ BMT və digər platformalarda deyil, yerində həll olunmalıdır.
Bölmənin digər xəbərləri
