Politoloq: Ermənistanın Laçın yolu ilə bağlı yaratdığı "şou" məqsədlidir
Bakı, 7 avqust, AZƏRTAC
Dövlətimizin başçısının “Euronews”a verdiyi müsahibə bir çox məqamlar baxımından olduqca vacib və xüsusi önəm daşıyır. Müsahibə bütövlükdə bölgədə sülhün və təhlükəsizliyin təmin olunması istiqamətində strateji yol xəritəsinin şifahi izahı kimi də qəbul edilə bilər. Belə ki, Prezident İlham Əliyev Azərbaycanın sülh tərəfdarı olduğunu və bu məqsədə çatmaq üçün məhz Ermənistan hakimiyyətinin lazımi siyasi iradə ortaya qoymalı olduğunu bəyan edib. Erməni cəmiyyətinə yönəlmiş açıq mesajlarda da vurğulanır ki, Azərbaycanın heç bir halda Ermənistana qarşı ərazi iddiası yoxdur və reinteqrasiya, eləcə də ikitərəfli əməkdaşlığın qurulması vacibdir.
Həqiqətən də sülhün əldə olunmasının yeganə şərti hazırda Ermənistanın siyasi hakimiyyətinin atacağı növbəti addımdan asılıdır. Müzakirələr konstruktiv mövqedə aparılarsa və heç bir tərəddüdlü fikirlər ortaya qoyulmazsa, eləcə də vaxt uzatmaq kimi siyasi manipulyasiyalar tətbiq olunmasa, ilin sonunadək bu missiyanı başa çatdırmaq olar.
Bu fikirləri AZƏRTAC-a açıqlamasında politoloq Amid Əliyev söyləyib.
Politoloq qeyd edib ki, müsahibədə diqqəti çəkən əsas məqamlardan biri də Laçın yolu ilə bağlıdır. Dövlətimizin başçısı bunun Azərbaycanın legitim hüququ olduğunu bir daha vurğuladı və yolun məhz humanitar məqsədlər üçün daim istifadə oluna biləcəyini bir daha təsdiqlədi. Ermənistan tərəfinin yaratdığı "şou" isə məqsədlidir və Azərbaycana qarşı təzyiq vasitəsi kimi istifadə olunur. Əgər doğrudan da ərazidə "humanitar fəlakət" varsa, bu, Azərbaycanın təklif etdiyi variant üzrə həll oluna bilər.
“Müsahibədə Qərbin və Rusiyanın yaranmış vəziyyətdə üzərilərinə düşən məsuliyyətləri haqqında vacib məqamlara da toxunuldu. Bildirildi ki, Qərb platformasının, xüsusilə də ABŞ-ın və Avropa İttifaqının (Aİ) vasitəçiliyi ilə keçirilən görüşlər Azərbaycan üçün məqbul hesab edilə bilər. Çünki bu müstəvidə aparılan danışıqlarda Azərbaycanın milli maraqlarına və təhlükəsizliyinə təhdidlər və təzyiqlər mövcud deyil. Artıq məhz bu platforma üzərində tərəflər arasında müvafiq razılaşmalar da əldə olunub. Bundan əlavə, Rusiyanın da səyləri ortadadır. Danışıqlar, həmçinin rəsmi Moskva müstəvisində aparılır. Rusiya Azərbaycanla strateji müttəfiqdir. Bütün danışıqlar məhz bu prizmadan, Azərbaycanın ərazi bütövlüyü çərçivəsində və milli maraqları baxımından aparılmalıdır. Bu şərtlər daxilində Azərbaycan sülh danışıqlarını istənilən müstəvidə və əməkdaşlıq platformasında davam etdirə bilər”, - deyə A.Əliyev bildirib.
Onun sözlərinə görə, bölgədə yaşayan erməni əsilli Azərbaycan vətəndaşlarının reinteqrasiyası ətrafında aparılan müzakirələr də diqqətçəkən məqamlardan hesab olunur. Bu prosesdə iştirak etmək istəyənlər Azərbaycanda yaşayan digər etniklər kimi bütün hüquq və vəzifələrdən istifadə edə biləcəklər. Bunu istəməyənlər isə son ünvan kimi Ermənistanı və ya digər üçüncü ölkəni seçməli olacaqlar. “Son zamanlar Azərbaycan-Ermənistan görüşlərində Qərbi azərbaycanlıların geri qayıtması haqqında məsələnin də gündəmə gətirilməsi diqqəti çəkən məqamlardan biri olduğu üçün bu məsələ müsahibə zamanı da müzakirə olundu. Əgər sülh sazişi imzalansa, bunun ardınca da ikitərəfli münasibətlər qurulacağı təqdirdə, Ermənistandan deportasiya olunmuş 250 mindən çox azərbaycanlı öz dədə baba torpaqlarına qayıtmaq hüququnu da əldə etmiş olacaq”, - deyən politoloq diqqətə çatdırıb ki, beləliklə, dövlətimizin başçısının “Euronews”a müsahibəsi tam mənasında müsbət siyasi və hüquqi notlara köklənmiş, bölgədə sülhün təmin olunması üçün konkret addımlar sistemini əhatə edir. Bu baxımdan hesab etmək olar ki, növbəti görüşlər ərəfəsində artıq Azərbaycan öz rəsmi mövqeyini vasitəçilərə və Ermənistan siyasi hakimiyyətinə bir daha bildirmiş oldu”.
Bölmənin digər xəbərləri
