Politoloq: Fransanın Azərbaycana qarşı son bəyanatı bölgədə mövcudluğunu təmin etməyə yönəlib
Bakı, 13 aprel, AZƏRTAC
Aprelin 11-də Azərbaycan-Ermənistan şərti dövlət sərhədində baş vermiş növbəti erməni təxribatı yenə də Ermənistan üçün baha başa gəldi. Belə ki, Ermənistan çoxlu sayda hərbçisini itirdi. Bundan əlavə, ermənilər təxribat baş verən bölgədəki mövqelərini qoyub qaçdılar. Azərbaycan Ordusu tərəfindən erməni təxribatının qarşısı tam şəkildə alındı. Hazırda ərazidə operativ nəzarət Azərbaycan bölmələrinin müşahidəsi altındadır.
Bu fikirləri AZƏRTAC-a açıqlamasında politoloq Amid Əliyev söyləyib.
Politoloqun fikrincə, ənənəvi olaraq Ermənistanın işğalçı siyasətini dəstəkləyən Fransa bu təxribatdan sonra da Azərbaycanı günahlandıran bəyanatla çıxış edib. Belə ki, Fransanın Avropa və Xarici İşlər Nazirliyi bu təxribatda Ermənistanın mövqeyini dəstəkləyib. Fransanın məhz bu mövqedən çıxış etməsi isə heç də təsadüfi deyil. Bölgəyə real olaraq nüfuz edə bilməyən Fransa, təbii ki, bu cür təxribatlarda Ermənistanı dəstəkləyən bəyanat və çıxışlar verir. Birinci Qarabağ müharibəsindən keçən 30 il ərzində Azərbaycan-Ermənistan arasında vasitəçi olan Fransa Ermənistanın təcavüzkar və işğalçı siyasətinə indiyədək real qiymət verməyib. Həmçinin Azərbaycanın milli-mənəvi, tarixi abidələrinin və dini ibadətgahlarının Ermənistan tərəfindən dağıdılması faktına Fransa sadəcə susub. Avropada insan hüquqları, humanizm və demokratiya carçısı kimi tanınan Fransa bir milyona yaxın azərbaycanlının deportasiya olunmasına və onların genosidə məruz qalmasına görə Ermənistanı ittiham etməyib. Birinci Qarabağ müharibəsində itkin düşmüş 4 minə yaxın azərbaycanlının taleyi haqqında məlumatların Azərbaycana verilməsini və eyni zamanda, minalı ərazilərin real xəritələrinin təqdim edilməsini Fransa Ermənistandan tələb etməyib.
“44 günlük Vətən müharibəsindən sonra total şəkildə Azərbaycana qarşı qara PR kampaniyasına başlayan Fransanın son bəyanatı tamamilə yersiz və reallığa uyğun olmayan bir aktdır. Bu kimi aktlar Fransa tərəfindən dəfələrlə Azərbaycana qarşı tətbiq olunub, amma real olaraq heç bir nəticə hasil olmayıb. Fransanın belə çıxışlara yer verməsi bölgədə sülhün və təhlükəsizliyin təmin olunması işinə zərbə vurmaq, bölgədə mövcudluğunu təmin etmək və vasitəçi kimi öz hüquqlarını geri qaytarmağa yönəlib.
Praqa görüşündən sonra Ermənistanın diplomatik baxımdan tam məğlubiyyətə uğraması və Fransanın rəsmi olaraq vasitəçilikdən uzaqlaşdırılması Fransa siyasi sistemində Azərbaycana qarşı ciddi qısqanclıq və narahatlıq hissi yaradıb. Fransa bunu birbaşa və dolayısı ilə bölgədə baş verən siyasi proseslər fonunda işğalçı Ermənistanın mövqeyini hərtərəfli şəkildə dəstəkləyən siyasətlə ifadə edir. Fransa Ermənistanı dəstəkləyən fikirlər səsləndirmək əvəzinə, 2020-ci il 10 noyabr tarixli üçtərəfli Bəyanatın, Brüssel, Moskva və Praqa görüşlərinin nəticəsi olaraq Ermənistanın üzərinə düşən öhdəlikləri yerinə yetirməsini erməni həmkarlarından tələb etməlidir. Azərbaycana qarşı Avropa Şurasında hansısa qərəzli qətnamələrin qəbul olunmasına ciddi səy göstərən Fransa öz vətəndaşlarının hüquqlarını təmin etməlidir. Həmçinin Korsika əhalisinin baza hüquqlarının tanınmasına yönəlik tədbirləri də yerinə yetirməlidir”,-deyə A.Əliyev vurğulayıb.
O əlavə edib ki, Azərbaycan öz suveren ərazisində baş verəcək bütün növ təxribatların cavabını qətiyyətlə verir və bundan sonra da verəcək.
Bölmənin digər xəbərləri
