Polkovnik: Torpaqlarımızın azad edilməsi uğrunda döyüşən sərhədçilərimizin qəhrəmanlığı hər zaman xatırlanır
Bakı, 17 avqust, AZƏRTAC
18 avqust sərhədçilərin peşə bayramı günüdür.
Bu əlamətdar gün münasibətilə AZƏRTAC-a açıqlama verən Müharibə, Əmək və Silahlı Qüvvələr Veteranları Təşkilatının sədr müavini, polkovnik Cəlil Xəlilov sərhədçilərin Vətən müharibəsindəki rolunu yüksək qiymətləndirib: “Azərbaycan sərhədçiləri milli dövlətçilik tariximizdə sərhədlərimizin təhlükəsizliyinin təmin olunmasında, suverenliyimizin qorunmasında hər zaman mühüm rol oynayıb, fədakarlıqları ilə müstəqilliyimizin möhkəmlənməsinə böyük töhfələr veriblər. 44 günlük Vətən müharibəsində sərhədçilərimizin sərgilədiyi qəhrəmanlıqlar, 8 Noyabr Zəfərinə verdiyi misilsiz töhfə buna nümunədir.
Vətən müharibəsində Müzəffər Ali Baş Komandan İlham Əliyevin rəhbərliyi ilə Azərbaycan Silahlı Qüvvələrinin ayrılmaz tərkib hissəsi kimi döyüşlərə atılan sərhədçilərimiz, bir çox yaşayış məntəqələrinin düşmən işğalından azad edilməsində mühüm rol oynadı. Onlar sürətli hücum əməliyyatları ilə Arazboyu əraziləri qısa müddətdə düşməndən təmizlədi. Mədəniyyət paytaxtımız olan Şuşanın azad edilməsində də sərhədçilərimiz böyük igidliklərə imza atdı. Əminəm ki, onların bu qəhrəmanlığı hər zaman sevgi və heyranlıqla xatırlanacaq”.
Onun sözlərinə görə, müharibə əsgərlərimizin gücü, qətiyyəti ilə yanaşı, zabitlərimizin, generallarımızın dərin zəkası, cəsarəti və yüksək şəxsi keyfiyyətləri də üzə çıxdı. DSX-nin rəisi general-polkovnik Elçin Quliyevin 44 günlük müharibənin hər günü, hər saatında sərhədçilərimizlə bir yerdə oldu, onları böyük Zəfərə ruhlandırdı. Sərhədçilərimiz postmüharibə dövründə də dövlət sərhədlərimizin möhkəmlənməsi istiqamətində mühüm işlər görüb, erməni təxribatlarının qarşısını qətiyyətlə alıb.
Prezident İlham Əliyevin sərhədçilərimizə göstərdiyi diqqət və qayğı, onlar haqqında səsləndirdiyi yüksək fikirlər dövlətimizin başçısının sərhədçilərimizə olan inam və etimadı əks etdirir. Prezidentimizin sərhədçilərimizə verdiyi yüksək qiymət bir daha onu göstərir ki, dövlət sərhədlərimizin mühafizəsi etibarlı əllərdədir. Sərhədlərimizi pozmaq istəyənlər isə bundan sonra da layiqli cəzalarını alacaqlar”.
Qeyd edilib ki, Müzəffər Ali Baş Komandan İlham Əliyev tərəfindən daim qiymətləndirilir. Dövlətimizin başçısının bu gün imzaladığı sərəncamlarla Azərbaycan Respublikası dövlət sərhədinin mühafizəsinin təmin edilməsində, ölkənin ərazi bütövlüyünün qorunub saxlanılmasında və sərhəd mühafizə orqanları qarşısında qoyulmuş tapşırıqları yerinə yetirərkən fərqləndiklərinə görə DSX-nin 53 hərbi qulluqçusunun ali rütbə, orden və medallarla təltif olunması sərhədçilərimizin xidməti vəzifələrini peşəkarlıqla yerinə yetirmələrinə və vətənpərvərliyinə verilmiş ali diqqət və qayğının növbəti təzahürüdür.
Bölmənin digər xəbərləri
